Read Q'anjob'al Job 29 Bible Online

Job 29 - Q'anjob'al bible

Job 29

¹Max c'oli k'anjab cham Job junelxa axca ti':

²Matawal chi je' in meltzoj junelxa axca jun tiempoal yalantok yet caw wal taynebil in yuj Dios.

³A yet tzektebil in yuj Cham, chi je' wec' xol k'ekk'inal.

⁴A wal yet tol caw wal tec'an in wali, a yet tu' txequel is watx'c'ulal Dios yiban tzet ayin.

⁵A ton yet tu' ayc'al ec' Cham chi je' yuj masanil wetok; ajun eb wuninal chi ayji ec' wetok.

⁶A yet tu', xiwil leche max yak' no' in wacax c'al no' in chiwo; a wawoj oliva comonxac'al chi ch'ibaj xolak ch'en.

⁷A yet max quin apnic'al bay puertail conob, chin ay chotan xol eb yajaw,

⁸a yet chin yilon eb ach'ej, chi el eb yul in be; axa eb ichamtak winak, chi aj lecan eb yet chin yilon eb.

⁹Toltax eb mimek winak chi bek eb k'anjabi, chi tx'ox eb yechel yet chi tz'inji ay anima.

¹⁰A eb yajawil conob, chi yiaytek eb yul is nuk', c'amxa tzet chi yal eb.

¹¹A yet chin yilon eb anima c'al yaben eb tzet chi wala', caw wal max in yic'al aj can eb c'al yalon eb watx' k'anej win.

¹²Yujtol ayin ti' max in colwaj bay eb c'amxa is mam c'amxa is txutx c'al yetok bay eb meba', a ton juntzan tu' c'am mac chi colon xol yailal.

¹³A eb tol lananxa cami max yal eb yuj diosal ayin; chi tzalojbi aj c'ul eb xal tol camnakxa yichamil yuj in colwal.

¹⁴A tojolal c'al ikemal wet wal yayji oc ayin ti', axca tol in pichil yayji oc masanil c'ual.

¹⁵Max in quetzic' eb c'am chi uj yilwi, max in colwaj c'apax bay eb palta yayji yakan.

¹⁶Axca wal mamej in bay eb ay wal is cawxinakil, max in colwaj bay eb tx'ok conobal yin watx'ji el is k'anej eb.

¹⁷Max wiel yikbej eb lanan yetnewi anima, cax max in coloncan el eb ayoc yul k'ab eb.

¹⁸Ayin ti' max in na tol lajan wal ok yun bisil in c'ual axca wal arena, yinxa ichamil ok yun in cam bay cajan in.

¹⁹Lajan in wal axca junok te te' tol awbil bay is ti' junok a' aej, axa yin is k'ablak chi low yal ak'bal yet ak'balil.

²⁰A in mimanbilal ac'ala'c'al ok beytok, c'am bak'in ok pax wip yin in colon in ba waloni.

²¹Masanil anima max taynej yab tzet max wala', cax tz'inc'al ẍi eb yet max yaben eb in nabal.

²²A yet max lajwi in k'anjabi, tok ay mactxel chi cayec'neni. A in k'anej watx'c'al chi yab eb.

²³Yetok wal masanil c'ul eb chi chaon eb yabej, axca wal jechbanen jayoc nab yet waresma.

²⁴A yet chin tzewi yetok eb, ijan c'am chi yaoc eb yin c'ul ta yel, toxac'al t'anan oc eb win yuj chin tzalojbi yetok eb.

²⁵Max wawal oc wikbej nan xol eb, cax max in naon tzet yetal yowalil chi yun eb. Max wut in ba axca wal junok rey tol ayoc satak is soldado. A yet ayoc eb yin cusc'ulal, ayin ti' max in mimanc'ulnej eb.