Read Q'anjob'al Job 3 Bible Online

Job 3 - Q'anjob'al bible

Job 3

¹Axa max yun xin, max yalon cham Job yobal k'anej yin c'ual yaljubal. Max yalon axca ti':

³Caw wal yob yet jun ak'bal yet max in oc yin in txutx. Caw wal yob yet jun c'ual yet max quin alji.

⁴Matawal a jun c'ual tu' tol max yutcan aj ba yin ak'balil, matawal cac'al tu' max eq'uel yuj Dios, maj sakbok aj yet jun c'ual tu'.

⁵Matawal a junok miman k'ek ewan max oqui, yet watx' k'ekk'inalc'al, ma junok miman k'ek asun max makchen el xin, yet watx' max oc xiwc'ulal.

⁶Matawal max ocxac'alcan k'ekk'inal yet jun ak'bal tu', axa jun c'ual tu' maj oc bisilok c'ual jun xajaw c'al jun abil tu'.

⁷Matawal c'am tzet max yak' jun ak'bal tu', matawal c'am aw yet tzalojc'ulal max uji.

⁸Matawal max catabnej eb ajbal jun ak'bal tu', eb tol ay yikbej yiban no Leviatán.*fn*

⁹Matawal maj ajol puj yet jun k'inibalil tu', tamwal max ajol sakk'inal tol chi echbanelay c'alta'a, matawal maj il-lay tit cakil yichcan.

¹⁰Caw wal yob jun ak'bal tu', tol maj tenoc wanaj waljubal yet maj wil jantak yailal c'al cusc'ulal ti'.

¹¹¿Tzet yuj xan maj in camxac'al yet ayinto oc yin in txutx, ma xin aokab yet max in alji max in cami?

¹²¿Tzet wal yuj xan ay jolom penequej max in chaoni, yetok imej max in tz'ubu'?

¹³Matawal tol max in cami; lanan mi in way yin tzalojc'ulalil tinani'; yin junc'ulalil chin xewi,

¹⁴yetok eb rey c'al eb ay yopiso, a ton eb max watx'nen aj yili mimek icham na,

¹⁵ma xin, yetok eb mimek yajaw tol max yak' noj is despacho yetok oro c'al yetok plata.

¹⁶¿Tzet yuj xan maj in muklay axca junok eq'uil unin, axca junok unin tol camnakxa yet c'amto chi alji?

¹⁷A bay mukbanil camnak, a tu' chi lajwican is yetnewomal eb yobtakwom, axa eb c'unbinak, a tu' chi ilchaj is xewilal eb.

¹⁸A bay tu' chi ilchaj junc'ulal yuj eb preso yayji, tok okto yab eb yel yaw eb caporal.

¹⁹A bay tu' ayic' eb yajnakil c'al eb yaynakil, jun lajanxac'al yayji eb. A bay tu' chi il-lay eb mosejal tol bekanxa yul k'ab is patrón.

²⁰¿Tzet yuj xan chi yak' Dios sakk'inal yil eb chi yetnej c'ul? ¿Tzet yuj xan chi yak' Cham yiquisal eb tol ayoc yin cusc'ulal,

²¹bay eb tol lanan yechbanen jayoc camich, palta c'amc'al chi cam paxok, caxc'al tol yelxac'al chi sayic' is camichal yintak beyomal tol ebebil elok?

²²A is tzalojc'ulal jun anima tu' chi chaloj yuj ato yet mayal tojcan bay is mukbanil.

²³¿Tzet wal yuj xan chito ak'lay is cawil junok anima tol man yojtakok bay chi ca toji, axca wal tol makan yayji yuj Dios?

²⁴A yet chi wochej chin lowi, asan ok'il chi wunej, c'amxa chi je' chin bek in k'akwi.

²⁵A masanil tzet yetal yelxac'al chi aj can in xiwc'ulal yuj, a wal juntzan tu' max jayoc wiban.

²⁶C'amxac'al jabok in xewilal, tamwal watx'to wayji ec'ok. C'amxa junc'ulal chi chaloj wuj, asanxanej yailal chin oni.