Read Q'anjob'al Job 31 Bible Online

Job 31 - Q'anjob'al bible

Job 31

¹Ayin ti' max in na tol tamwal chi wiloc in c'ulok yin eb ix k'opoj.

²¿Baytal ay paktzebal chi yak' Cham aj satcan tol chi je' yuj masanil, bay eb anima yuj tzet chi yunej?

³Manminak tol a bay eb yobtakwom c'al bay eb c'am Dios yul sat chi jayoc yatakilal.

⁴Tokwal c'am chi yil Dios tzet yetal chi wunej, ¿tom c'am chin yil bayc'al chin eq'ui?

⁵Chi wak' in ti' tol c'am wal bay max waoc in ba yin yobtakil, c'am bay max ec' yul in c'ul wetnen junok mactxel.

⁶Watx' tol chin echelay yuj Dios bay yul libra tol tz'akan; caywal tu' ok yun yilon eltek in watx'ilal.

⁷Tatol max in elcan bay yul beal tojolal, tatol max in bek in ba bay tzet yetal ochbejtak yili ocok, ta ay tzet yetal yet eb anima max ilchaj el ayin,

⁸tx'okxaokab mactxel chi looncan aytok tzet yetal max wawa', jotokab ajtek eb xe' tzet yetal awbil wuj tu'.

⁹Ta ay bay max wiloc in c'ulok yin yistzil junok wet conob, ma ay bay max in makxac'al bay puertail yatut,

¹⁰ocokab xal wetbi yilomalok junok mactxel, wayokab junok tx'ok winakil yetok.

¹¹Yelxac'al mi miman yobtakil jun tu', moj mi wal jayoc miman yailal yuj.

¹²Lajan mi wal axca junok bolob chi ak'on lajwok masanil, chi mi yak' lajwok masanil tzet yetal ay ayin.

¹³Ta a eb in chekbej max yal janic'ok tzet yetal ayin, max in cha wab tzet yetal max k'an eb.

¹⁴Ta c'amak, ¿tzetto wal chi yun woc satak Dios? ¿tzet wal ok wut tak'wok in ba bay Cham yet chi k'anlen el tzet max wunej?

¹⁵Junnej Dios max on ak'on pitz'c'oj aj yin co txutx yetok eb in chekbej tu', ac'aloc Cham max ak'on jiquisal.

¹⁶C'am bay tol maj in colwaj bay eb meba' nan xol is cawxinakil, tamwal max yal in c'ul tol max yetnej eb ix ix camnak yichamil c'ul yuj wajil.

¹⁷A yet max quin lowi c'am bay tol maj wak' yet eb meba'.

¹⁸Axca wal wuninal max wutc'al eb meba' tu'; ayin ti' max in colc'al eb xal camnakxa yichamil.

¹⁹A yet max wiloni tol ay mactxel tol c'amxac'al is pichil, ma junok meba' tol c'amxac'al tzet yetal ayoc yin,

²⁰a xil in calnel max waoc is k'aẍnubalok eb; yuj tu' xan max yal eb yuj diosalil ayin.

²¹Ta ay bay max wiaj in k'ab yin junok meba' yujxac'al tol wojtak tol chabil wet yuj eb yajaw,

²²watx'xac'al mi tol chi mak'lay el in k'ab; elokab tuknaj jun in k'ab ti'.

²³Ayin ti' max in xiw bay yailal chi yak' Dios, yujtol man ok je' in tec'ban in ba bay satak yikbej Cham.

²⁴C'am bay tol asan yin ch'en tumin max waoc in nabal, tamwal max waoc ch'en oro yipok in c'ul.

²⁵C'am bay tol max wochejxac'al chi aj can in beyomal, c'am c'apax oc yin in c'ul tol chi wi' miman tumin.

²⁶Max wil wal jopopial yakan c'u, yetok c'apax yet tec'an xajaw watx'xac'al yili,

²⁷palta c'am bay max in oc yin ayilal bay juntzan tu' yin ewantakil, tamwal ay bay max in tz'ubil in k'ab yin in tx'oxon ayilal bay.

²⁸Ta max wun axca tu', moj mi wal tol chi alay oc yailal wiban; ta axca tu' yin mi cabsatil chi wiay in ba bay Dios Cham aj satcan, chi yal tu'.

²⁹C'am bay max tzalojbi in c'ul yuj yailal max yab eb wajc'ul, tamwal max in tzaloji yet max jayoc yatakilal yiban eb.

³⁰C'am bay max oc in mul in k'anon camichal eb.

³¹Masanil eb cajan ec' wetok, yojtak wal eb tol a yet max jayoc eb tx'ok conobal ayin, c'am junok eb tol maj wak' lowok.

³²Maj yal in c'ul tol chi cancan eb ec'jabwom bay yulak calle yet ak'balil; jakanc'al puertail watut bay eb.

³³C'am bay max in c'ubaj el in yobtakilal, axca chi yun juntzanxa eb, c'am bay tol ewantak yayji in mul wuj,

³⁴yuj chin xiw bay eb anima, talaj yob tzet chi yal eb win. Tamwal max in makchej octok in ba yin tz'inanil yul in na yuj xiwc'ulalil bay eb ayto wuj in ba yetok.

³⁵Matawal ay mactxel bekan c'ul yaben tzet chi wal ti'. A masanil tzet yetal max wal ti' tutun wal yel chi wala'. Axa tinani' chi wechbanej tzet in paktzebal yuj Dios Cham tol chi je' yuj masanil. A mac chin ak'on queja tu' matawal yin escritoal chi watx'nej is k'anej.

³⁶Chi mi wawal oc yin jolom in xic', ma yin in jolom axca corona juntzan k'anej tu' yuj in maynen in ba.

³⁷Chi mi wal bay Dios masanil tzet yetal max wunej, chin mi oc satak Cham yin c'am q'uixawtakil.

³⁸Ta toc'al tok'bil ec' tx'otx' tx'otx' wuj bay chin mulnaji, tatol toc'al ibil ec' wuj bay eb ay yet,

³⁹ta toc'al max in lo aytok tzet max ch'ibaj bay tu' yin maj in tojlanej bay eb mulnajwom, ta toc'al max watx'nej eb ay yet jun tx'otx' tu',

⁴⁰ch'ibokab te q'uix bay in tx'otx' q'uexelok ixim trigo, axa an yobal ac'un q'uexelok cebada. A yetok juntzan ti' max lajwi k'anjab cham Job yin colon ba.