Read Q'anjob'al Job 32 Bible Online

Job 32 - Q'anjob'al bible

Job 32

¹A yet max yilon eb oxwan winak tu' tol yelc'ulal chi yal cham Job tol c'am wal is mul, xan max bek eb teyelen ba yetok cham.

²Axa jun winak aj Buz chi yik Eliú, is c'ajol Baraquel is yinatil Ram, majxa techaj yowal c'ul yin cham Job a yet max yiloni tol chi yalc'al oc ba cham watx'il, cax chi tenon c'altok yiban Dios.

³Max tit c'apax yowal c'ul yin eb oxwan yamigo cham Job tu', yujtol maj nachaj el yuj eb tzet max yun paktzen is k'anej Job, palta ac'ala' chi yal eb tol c'am Dios yul sat cham.

⁴Yujtol a Eliú tu' ach'ej winakto xol eb tu', xan maxto yechbanej lajwi k'anjab juntzanxa eb tu' yetok cham Job.

⁵A yet max yiloni tol c'amxa chi je' paktzen eb tu' bay cham Job, majxa techaj yuj mitx'on waay ba,

⁶axa yalontok yet xol eb tu': Ayin ti' unin into, axa ayex ti' icham winak exxa, xan majc'al yal in c'ul max waltok in nabal xol e yet.

⁷Max in na': K'anjabokab eb icham winak ti', tx'oxokab eb is jelanil, quin chi.

⁸Palta xin masanil anima ayc'al is nabal, yujtol a Cham chi je' yuj masanil, a' chi ak'on yespíritu bay.

⁹Man yujok mimanxa jabilal xan ay co jelanil, tamwal yuj icham winak onxa, chi nachaj el juj.

¹⁰A yuj tu' xan chi wala': Moj wal tol che yab tzet chi wal tinani', yujtol ayin ti' ay c'apax janic'ok tzet ok wala', quin chi.

¹¹Max in taynej wab tzetak max e yal ayex ti', max ex wila' toxc'a che say wal e k'anej watx';

¹²max wilon c'apaxok tol c'am junok ex ayex ti' max je' e paktzen bay cham Job axca wal is mojalil.

¹³E yal talaji tol ay wal e jelanil. A Dios ok paktzen k'anej cham Job, yujtol maj je' e yuj ayex ti'.

¹⁴Palta tokwal a ayin max k'anjab cham Job ti', yuj tu' xan man ok in paktzej bay cham axca max yun e k'anjab ayex ti'.

¹⁵A tinani' mamin Job, a eb cham oxwan winak ti', toxac'al max somchaj aj c'ul eb cham, c'am wal is k'anej eb watx' yet max paktzen eb ayach.

¹⁶Ayin ti' ¿tom ok in tz'injok caxc'al a eb ti' c'amxa tzet watx' chi yal eb yujtol c'amxa chi nachaj el yuj eb tzet chi yun paktzeni?

¹⁷Palta ayin ti' c'amak, ok waoc in ba yin jun k'anej ti', cax ok walon in nabal.

¹⁸Xiwil in k'anej chi je' waloni, c'amxa chi je' in mitx'on waay in ba yetok;

¹⁹toxa chin nic'chaj yuj chi wabej, axca wal no tz'um tx'uy nojnak yuj ac' vino.

²⁰Yowalil ok walilok, catatu' ok jakchaj yin in c'ul, yowalil ok wak' junok paktzebal ayach.

²¹A tinani' man tx'ok tx'okok yel anima yul in sat, palta tol lajanc'al el masanil.

²²Wal yel, ayin ti' c'am chin beybalnej tol chi wiaj can junok mactxel; chin mi yak' lajwok Cham max quin watx'neni tatol chi wun axca tu'.