Read Q'anjob'al Job 34 Bible Online

Job 34 - Q'anjob'al bible

Job 34

¹Maxto k'anjabc'al Eliú:

²Ayex jelan ex c'al cuywinak ex ti', abek tzet ok wala':

³Axca chi yun yaben yul co ti' tzet chi co lo', axca tu' chi yun yaben co txiquin tzet chi al-layi ta watx'.

⁴Axca tu', co beyc'ulnejek el juntzan k'anej chi jal ti', cax chi nachaj el juj tzetbil yayji ocok.

⁵Chi yalon cham Job: Ayin ti' c'am in mul, palta a Dios c'am chi watx'nej el in k'anej.

⁶Lek'tial mi chi wala' tatol chi wala' tol ay in mul; a in yas ti' c'am chi taki, caxc'al tol c'am in mul, ẍi cham.

⁷Tok ay mac lajan yetok cham Job ti'. Subojxac'al buchwaj yin Dios, axcaxac'al juq'uen aej.

⁸Caw wal chi cha c'ul chi junanej ba yetok eb yobtakwom; a yetok eb anima yob is nabal chi eq'ui.

⁹Chi yaloni tol c'am tzet chi ji' yin junen watx'il satak Dios.

¹⁰Ayex tol ay e nabal ti', abek tzet ok wala'. A Dios Cham chi je' yuj masanil, xin tawal ok yun tzet yetal man tojolalok.

¹¹A Cham chi tojlanej bay junjun atac'ala' is yunben cax chi yak'on bay junjun tol moj chaoni.

¹²C'am chi je' co naoni tol chi yun Dios man watx'ok, tol man tojolok chi yut Cham chi je' yuj masanil.

¹³C'am mactxel max ak'on is yikbej Cham yin yak'on yajawilal bay masanil yulyibank'inal ti'.

¹⁴K'inalok ta chi el yin c'ul Cham wajban ec' yespíritu c'al nabalej ak'bil yuj bay eb anima,

¹⁵jun lajan mi chi yun co cam co masanil cax chon meltzojcan oc junelxa yin pokokal.

¹⁶Mamin Job, ta ay a nabal xin, ab tzet yetal ok wala'; tz'inc'al cachi yak'ban chin k'anjabi.

¹⁷K'inalok tatol man tojolok Dios ¿chi mi je' yak'on Yajawilal? ¿Tom chochej chak' low yin Cham tol tz'akan yin tojolal?

¹⁸Tatol yobtakwom eb rey c'al eb ay yikbej, a Dios c'am chi xiw yalon oc yin sat eb.

¹⁹A Cham c'am chi yaoc ba yetok eb yajaw, tamwal chi yaoc ba yetok eb beyom yintak eb meba', yujtol a Cham max watx'nen eb masanil.

²⁰Yin junnej bekal chi yun cam eb anima yet ak'balil; chi uchlay lajwok eb anima cax chi c'ayaj eb; chi c'ayaj eb ay yipalil yin c'am yalon yet anima yin.

²¹Chi yil Dios tzetc'al chi yun jec' ayon anima on ti', yojtak Cham tzet chi yun co bey junjun on.

²²C'am k'ekk'inal tol chi je' makchen el eb yobtakwom.

²³Man yowalilok tol chi occ'al ijan Dios beyc'ulnen el eb anima, yuj tu' xan man is mojok chi k'antok ba eb satak Cham.

²⁴Man yowalilok tol chi cam k'anlen yab Cham, catatu' chi je' yak'on lajwok eb mimek winak cax chi cancan is yikbej eb bay junokxa.

²⁵A Dios yojtak tzet yetal chi yun eb; chi apni oc Cham yet ak'balil cax chi c'aylay el eb yuj Cham.

²⁶Chi alay oc yailal eb satak masanil anima axca wal junok yobtakwom.

²⁷Caywal tu' chi yut Cham yujtol c'am chi yochej eb chi yikej, c'am chi cha yab eb is ley Cham yin beybalneni.

²⁸Max el yaw eb meba' c'al eb ok'bal c'ul yuj eb; a yaw eb tu' max apnitac'al oc satak Dios, max yaben Cham.

²⁹Ta a Dios c'am tzet chi yala' ¿mactxel ok je' yak'on low yin? Ta chi c'ubaj el ba Cham ¿macto wal ok je' yilon yin? A Cham lajanc'al yikbej yiban nacionlak c'al yiban anima yin junjunal

³⁰yin tenon ec'ok, tol a eb yobtakwom c'am chi oc eb yin yajawilalok eb conob yuj yetneni.

³¹Mamin Job, tokwal max al bay Dios: Max oc in mul, palta manxa ok wunej.

³²Tx'oxto wal in mul tol c'am chi nachaj el wuj tu' tinani'. Ta yob max wunej manxa ok wun junelxa, man cachiok.

³³¿Tom chi yochej a c'ul tol chi paktzej Dios ayach, axca wal bay chi cha a c'ul, xan maj a cha axca nabal Cham? Ach ok a na', mayinnak ok wala'. Alto wal ayon tzet yetal ojtak tu'.

³⁴Tzanc'al mactxel aj nabal chin abeni, ok yal eb axca ti':

³⁵Man yojtakok cham Job ti' tzet chi yala', c'am yelapnok is k'anej chi yal tu', ẍi mi eb.

³⁶Mimanokabc'al chi yun yak'layc'al porobal cham Job masantac'al lajub, yujtol a is paktzebal cham, lajan mi wal axca yet junok yobtakwom.

³⁷A Job ti', man asanok tol ajmul, palta yelxac'al tenomtak; co satak wali chi buchwaj yin Dios cax chi teyelen wal ba yetok Cham, ẍi cham Eliú.