Read Q'anjob'al Job 35 Bible Online

Job 35 - Q'anjob'al bible

Job 35

¹Max toc'al yal cham Eliú:

²¿Chi mi a na' tol jichan tzet max ala'? A Dios ok yala' tol c'am in mul, cachi.

³Caxc'al chal wal axca ti' bay Dios: ¿Tzet alon et caxc'al mi chi oc in mul? ¿tzet ok wi' ta c'am chi oc in mul tu'? cachi.

⁴Ayin ti' ok in tak'wok ayach c'al bay eb amigo ti'.

⁵Ajan t'anan bay satcan; caywal tu' ok yun eloni tol a asun yelxac'al can ayaj eban.

⁶Ta chi oc a mul, c'am tzet yetal ok on Dios oj; caxc'al xiwil a tenomtakil, a juntzan tu' c'am tzet chi yala'.

⁷Ta caw wal watx' tzetak chonej, c'am c'apax tzet chi yi' Cham en; c'am jabok tzet yetal tu' chi oc is watx'ilok Cham.

⁸A eb jet animail, a eb chi etax yuj a mul; a c'apax eb tu' watx' chi eloc yuj tzet yetal watx' chonej.

⁹A yet chi etax eb anima chi k'akwi eb, chi el yaw eb yin k'anon colwal yet chi el eb yul k'ab eb ay yipalil.

¹⁰Palta c'am chi sayic' eb jun Dios max watx'nen eb, Cham chi ak'on bitnok eb anima yet ak'balil,

¹¹a ton Cham ec'ban chon yut cuyon yintak no no', ec'ban jelanil chi yak' ayon yintak no tz'iquin.

¹²Chi el yaw eb chi etaxi, palta c'am chi tak'wi Dios bay eb, yujtol caw wal yob is nabal eb, caw wal tol chi maynej ba eb.

¹³Yujtol a Cham chi je' yuj masanil, c'am chi cha' yab k'anej c'am yelapnok.

¹⁴¿Tzet wal ok yun tak'wen ayach yet chaloni tol c'am cheloc yin Dios; tol a k'anej ayoc eban ayic' satak Cham, xan tol chechbanej tzet ok yun beyc'ulnen Cham? cachi.

¹⁵Chala' tol c'am chi tit yowal Cham, tamwal yaon oc yailal eb chi oc is mul, tamwal miman yelapnok eb ch'aan chi yut ba yul sat, cachi.

¹⁶Palta ach ti' mamin Job, c'am jabok tzet chi yal elapnok juntzan k'anej chal tu'. Xiwil chach k'anjabi, palta axq'uijan tol c'am a nabal yet chach k'anjab tu', ẍi cham Eliú.