Read Q'anjob'al Job 36 Bible Online

Job 36 - Q'anjob'al bible

Job 36

¹Maxtoc'al yal cham Eliú:

²A tinani' ak' mimanc'ulal, tol ok ach in cuyu'; ayto tzet yetal ok wal yuj in colon Dios.

³Ok in k'anbalnej in jelanil yelxac'al miman, yin in tx'oxk'abnen elok tol tojol Cham max in watx'neni.

⁴Ojtaknej elok tol man lek'tialok ok wal ayach; tol ayin chin k'anjab etok, tz'akan in jelanil.

⁵A Dios ay yipalil c'al tol ayxamay is jelanilal, palta c'am chi yintaknej el junok mactxel.

⁶Chi yiel Cham k'inal eb yobtakwom, palta chi watx'nej el is k'anej eb chi etnelayi.

⁷A Cham chi taynen eb anima watx' is beybal; a chi aon octok eb yin reyal yulak is trono; chi ilay aj can eb yin tojbalk'inal yuj Cham.

⁸Tatol chi c'al-lay ay eb yuj cadena, caw wal tol chi yab eb yail.

⁹A Dios chi tx'oxon oc is mul eb tol ch'aan max yut ba.

¹⁰Chi k'anjab Cham yuj yak'lay cuenta eb, cax chi yalon Cham tol chi bekcan eb is tenomtakil.

¹¹Tatol chi cha yab eb cax chi yaon oc ba eb yul k'ab Cham, caw wal ok yak' tzalojbok eb c'ul yin jantakto yiquisal.

¹²Palta tatol man ok cha yab eb xin, ok tzoc'lay cam eb, ok tokcan eb bay cambal yin c'am tzet yojtak.

¹³Axa eb c'am Dios yul sat, ayc'al yowal c'ul eb, caxc'al mi chi alay oc yailal eb yuj Dios, c'am chi yal ba eb bay yin k'anon colwal.

¹⁴Yin yach'ejal chi cami, chi lajwican ay yiquisal eb yin q'uixwiltakil.

¹⁵A bay nan xol is yailal junok mactxel, a Dios chi ak'on nachaj el is yobtakil yuj, yuj tu' chi colchaj el xol is yailal tu'.

¹⁶Axca tu' chi yochej Dios chach montej el yul k'ab c'aybanilal, cax ok ach yiontok bay jun lugar caw wal watx' bay c'amxa cawxinakil, yin ak'on tzalojbok a c'ul yin loj manxa watx'ilok bay a meẍa.

¹⁷Palta a tinani' a Dios chach beyc'ulneni, lanan a chaon yailal tol is moj wal chaon eb yobtakwom.

¹⁸Yuj tu' xan taynej a ba yet watx' c'am chach c'aylay el yuj Dios yin junnej bek yetok yowal c'ul. C'am chi je' chach colchaj el yuj xiwilok tumin bay jun yowal c'ul tu'.

¹⁹Tok ay yelapnok a beyomal yul sat Cham. Tok ay c'apax yelapnok caxc'al miman yayji oc epalil.

²⁰Taynej a ba yet watx' c'am chetek k'ekk'inal eban, chi yal elapnok a ton yowal c'ul Dios tol chi c'ayil nacionlak yuj.

²¹Taynej a ba yet c'amxa chot a ba ch'aanil, yujtol a jun ch'aanil tu' max a beybalnej yintak pax a chaon yailal.

²²Chi cam wal elon is miman yipalil Dios. Tok ay junok meẍtol chi je' lajlen ba yetok Cham.

²³C'am junok mactxel chi je' yalon bay tzet yetal ok yunej, tamwal tzuoni: Yob max otej, man ẍiok.

²⁴Masanil chi alon watx' k'anej yin yuj tzet yetal watx' max watx'nej, na' c'apaxok tol ach jun, ok al a watx' k'anej yin.

²⁵Masanil anima chi yila' caxc'al mi tol najat ay.

²⁶C'am chi nachaj el juj jantak wal yayji oc is mimanbilal Cham; tamwal chi je' co bison c'apax is yabilal.

²⁷A' chi ion ajtok junjun t'ujan a' aej bay can, axa a' tu' chi meltzoj oc yin nabil yuj.

²⁸Chi waj ba nab bay xol asun, cax chi ayc'ay nab bay yiban conob.

²⁹Mactxel chi nachaj el yuj tzet chi yun pojaxtok asun yuj Cham, ma tzet chi yun yak'on bil c'u tac'al bay is cajlobal.

³⁰A yuj Cham chi ec' joplabok rayo yinlak bay ayic'ok, a jopopial tu' chi txeclojtac'al jantak najatil yich a' mar yuj.

³¹Caytu' chi yun beyc'ulnen Cham eb conob, cax xiwil loj chi yak' bay eb anima.

³²A' mitx'nej aj rayo, chi k'okontok bay chi yal c'ul, cax palanc'al low yin.

³³A nilili bil c'u tu' chi aloni tol toxa chi jay yaxnab, toltax no jobbejal no' yojtak no' tol toxa chi jay nab tu'.