Read Q'anjob'al Job 37 Bible Online

Job 37 - Q'anjob'al bible

Job 37

¹A yet chi wilon cak'ek' yaxnab, caw wal chi xiwaj in c'ul, axcaxac'al tol chi el in pixan yuj xiwilal chi wabej.

²Abek wal bil c'u, a jun tu' is nuk' Dios chi oqui; a ton yul is ti' chi eltek jun chi bil tu'.

³A Cham chi aon ec' joplabok rayo bay satcan, chi txeclojtac'al bay is lajubal tx'otx' tx'otx'.

⁴Chi lajwi tu' cax chi ablay bil yoc yul is nuk' Cham ay yikbej tu'. A yet chi ablay bil tu' axa pax rayo xin, c'amxa chi oc wanaj yec' joplabok.

⁵C'ayubtakxac'al chi yun nilili bil yul nuk' Cham, ayc'al mimek tzet yetal chi yun Cham tol c'am chi nachaj el juj.

⁶A Cham chi aloni cax chi ayc'ay sakbacom yiban tx'otx' tx'otx' ti'; cax chi ayc'ay nab yuj yin tol ayxa is may.

⁷Catatu' a Dios chi makchen eb anima bay yatut, yet watx' chi nachaj el yuj eb masanil is yipalil Cham.

⁸Axa no no' chi toj no' yulak is nach'en, a bay tu' chi c'ubajcan octok ba no'.

⁹Chi tit owal cak'ek' bay yetc'ulal sur, axa bay norte xin, chi tit sic yuj cak'ek'.

¹⁰A yuj is cak'ek' Dios chi pitz'c'oj aj ch'en chew, cax chi chewbican el a' mimek aej.

¹¹A Cham chi aon oc aej xol asun, a bay xol juntzan tu' chi pitz'c'oj aj rayo.

¹²A asun chi ec'c'al bay chi cha c'ul Dios; caytu' chi yun yiken tzet yetal chi yal Cham bay masanil sat tx'otx' ti'.

¹³A yin juntzan tu' chi tx'oxon el ba Cham yin yak'on yailal ma yin yak'on watx'c'ulal sat tx'otx' ti'.

¹⁴Mamin Job, ab wal tzet chi wala', cax chi cam a naoni tol caw wal c'ayubtak yoc tzet yetal chi yun Dios.

¹⁵¿Chi mi nachaj el oj ach ti' tzet chi yun k'anbalnen Dios masanil juntzan ti', tzetbil chi yun yec' joplabok rayo xol asun tu'?

¹⁶¿Ojtak mi tzetbil chi yun cancan waan asun xol cak'ek'? A jun tu' chi tx'oxon el is jelanil Dios tol c'amxa yalbanil.

¹⁷Ach ti', puralxac'al chi techaj k'ak' oj yul a pichil, a ton yet chi tit cak'ek' bay sur xan numumixac'al chi yun sat tx'otx' ti' yuj.

¹⁸¿Chi mi je' a colwaj yetok Dios yet chi toj jenan jun satcan ti', axca junok jenan ch'en ch'en cax caw chi yuncanok?

¹⁹Al ayon tinani' tzet yetal watx' chi jal bay Dios; yujtol axca tol xol k'ekk'inal bay ayon ec'ok, c'amxa tzet watx' chi jala'.

²⁰Ayin ti' c'am chin tec'baj in ba waloni tol chin k'anjab yetok Dios, ta chi wunej, axca mi tol chi wochej chin ak'lay lajwok ayok.

²¹C'amxa chi je' jilon yakan c'u tatol chi k'ekbi oc asun yin; palta tatol chi xulay el asun yuj cak'ek' bay satcan tu xin, catatu' chi sakbi pax ajok.

²²Axcaxac'al jopopial ch'en oro, caywal tu' chi yun yili bay norte, axa yuj is tzekekial Dios toxac'al chi c'aycan aj co c'ul.

²³C'am chi nachaj el juj jantak wal yayji oc Cham tol chi je' yuj masanil, yujtol c'amxa axca yayji oc is tec'anil c'al is tojolal; caw wal tojol, c'am bay chi yetnej junok mactxel.

²⁴Yuj tu' xan caw wal chi xiw eb anima bay; tok ay jabok yelapnok eb chi yaloc ba aj nabalil satak Cham, ẍi cham Eliú.