Read Q'anjob'al Job 38 Bible Online

Job 38 - Q'anjob'al bible

Job 38

¹Lajwi tu xin, max k'anjab Jehová bay cham Job nan xol owal cak'ek', max yalon axca ti':

²¿Mac ach txel xan tol cha c'ubaj el in jelanil yetok a k'anej c'am yelapnok?

³Tec'baj a ba xin, cax cha paktzen juntzan in k'anlebal ok wal ti':

⁴¿Baytal ayach ec'ok yet max in watx'nen ay cimientoal yich tx'otx' tx'otx' ti'? Al ayin tatol yel xiwil tzet ojtak.

⁵¿Ojtak mi mactxel max naoni jantak wal max yun yay yechel yich tu'? ¿mactxel jun max nabalnen tzetbil yayji?

⁶¿Ojtak mi baytal batxan ay cimientoal yich tu'? ¿Mactxel max babji yaon ay ch'en ch'en ayay yichok?

⁷A yet toxa chi k'inibi aj yet jun c'ual tu', a waycan max bitni, yetok masanil eb ángel max el yaw eb yuj tzalojc'ulal.

⁸A yet max pultok a' mar bay yiban tx'otx' tx'otx', ¿mactxel max aon oc makil a' yet max cancan wajan a'?

⁹Ayin max wak' jun asun is pichilok, ac'ala' asun tu', max wak' c'apax is chulilok.

¹⁰Ayin max wacan ay is mojonail a' mar, max waoncan oc llaveal is puertail.

¹¹Max walon bay a' axca ti': Asan cayti' chach can c'ananok, c'amxa chi je' ec'tok; a cayti' ok ach jayoc pomnajok, quin chi bay a'.

¹²¿Ayxam bay chak' junok chekbanilej yul a tiempoal ti', xan max tit cakil yichcan cax max sakbi aj yet junxa c'ual,

¹³cax max toj sakk'inal bay masanil sat tx'otx' tx'otx', xan max toj c'ubaj el ba eb yobtakwom?

¹⁴Caw wal chi txecloj tzetbil yili tx'otx' tx'otx' yuj yakan c'u yet chi k'inibi, axca yili wak'quiẍtakil junok pichilej, ma axca chi yun cancan yechel sello yin ixcab tx'otx'.

¹⁵A sakk'inal tu' chi mitx'on waay eb yobtakwom, yuj tu' xan c'amxa chi je' yuj eb.

¹⁶¿Ay xam bay max el juntzan xab olan tol ewanc'uan yayji bay chi ca tit nuk' a' mar?

¹⁷¿Mayal mi ela' baytal ayoc is puertail cambal?

¹⁸¿Ojtak mi jantak yayji oc yechel sat tx'otx' tx'otx' ti'? Al ayin xin, tatol yel ojtak masanil.

¹⁹¿Ojtak mi beal bay ayic' sakk'inal c'al bay ayic' k'ekk'inal?

²⁰¿Chi mi je' chetok sakk'inal bay lajubal, cax cheon pax meltzoj junelxa bay cajan?

²¹¡Ojtak sic'libil! Yujtol mimanxa abilal, mayalxam ach alji yet max watx'ji masanil tzet yetal.

²²¿Ayxam bay max ach betic' bay wajan ec' ch'en chew yetokc'al ch'en sakbat wuj?

²³C'uan ec' wuj yet chin k'anbalnej yin waon oc junok yailal ma yuj junok owal.

²⁴¿Tzet beal chi yi' sakk'inal yet chi pojontok ba? ¿Tzet chi yun pojontok ba cak'ek' chi tit bay yetc'ulal yichcan?

²⁵¿Mactxel chi jakon bay chi ca tit secnaj yaxnab, cax chi tx'oxon bay chi ca toj owal cak'ek' yax nab,

²⁶yet watx' chi yak' nab bay takin tx'otx', bay juntzan lugar c'am mactxel cajan,

²⁷yet chi oc yal tx'otx' tx'otx' tol aycan tx'oklil, cax chi ajol an yax ac'un?

²⁸¿Mactxel mamej yayji yin nab c'al yin yal ak'bal?

²⁹¿Mactxel txutxej yayji yin ch'en chew?

³⁰¿Mactxel chi ak'on cawbok a' aej axca ch'en ch'en; cax chi cawbi el sat a' mar yuj sic?

³¹¿Chi mi je' a wajban oc waycan chi yik Motz, ma chi je' a saklemnentok juntzan waycan chi yik Orión?

³²¿Ach mi chak' ajol puj yet toxa chi k'inibi? ¿Ach mi cheiltek juntzan waycan chi yik Miman Osa c'al Yaliẍ Osa?

³³¿Ojtak mi juntzan leyal chi yajawbi bay satcan? ¿Ach mi chaoc juntzan ley tu' bay sat tx'otx' ti'?

³⁴¿Chi mi je' alon bay asun tol chi yak' ay secnaj nab?

³⁵¿Chi mi je' a chekontok rayo yet chi toj bay junok lugar? ¿Chi mi tak'wi ayach: Tix in ti', ẍi mi?

³⁶¿Mactxel max ak'on jelanil c'al ojtakbilal bay nabalej?

³⁷¿Mac wal txel yelxac'al jelan tol yojtak jantak wal asun ay? ¿Mactxel chi je' secon el aej ayoc xol, cax chi yak'on nab,

³⁸yet watx' a pokok chi yutcan oc ba yin ixcab tx'otx'al cax junxanej wecan chi yut ba?

³⁹¿Tom ach cha say is chibej no txutx coj, yet chi c'uban ba no' bay is wayub, ma chi mak is chibej tu' bay xolak ac'un yet watx' chi chi' yune' no' masantac'al chi yal noj c'ul no'?

⁴¹¿Mactxel chi tx'oxon lobej no txutx joj yet chi ec' no' sayon is lobej no yune', yujtol chi el yaw no' k'anon lobej ayin?