Read Q'anjob'al Job 4 Bible Online

Job 4 - Q'anjob'al bible

Job 4

¹Max yalon cham Elifaz aj Temán:

²Wal yel, a tinani' ach Job, ya' mi chabej ta ay mac chi tec'baj ba k'anjab ayach, palta maj je' tol tz'inc'al con chi.

³Xiwil mac bay max ak' cuybanilej, c'al max aon oc yip is nabal eb sombinak ay.

⁴Max a wal oc is nabal eb aynak c'ayok, cax max a mitx'on waay eb tol toxa chi ayc'ayi.

⁵Axa tinani' yobxac'al chot a ba, c'amxac'al jabok a tec'anil, yujtol ach wal lanan aben yail.

⁶Caw wal ayilwom ach bay Dios, tol tojol a beybal aloni. ¿Tzet yuj xan chi cabax aj a c'ul tinani'?

⁷Nato wali tatol ayxa junok c'am is mul max ayc'ay yailal yiban.

⁸A chi yun wilon ayin ti', tol a mactxel chi beybalnen yobtakilal, axca yobtakil chi yun tu', a' chi jayoc yiban.

⁹A Dios chi yatok yowal c'ul yiban eb, cax chi lajwi ay eb yin junelnej yuj Cham.

¹⁰Caxc'al mi a eb yobtakwom lajan eb axca no coj chi el yaw, palta a Dios chi ak'on tz'injok ayok axca tz'inji no' yet mayal mak'lay eltek ye.

¹¹A juntzan coj tu' chi cami yuj c'amxa chi ilchaj is chibej, toxac'al chi saklemcantok is yune'.

¹²Yinxac'al c'ojanc'ulalil max apni oc jun k'anej ayin, puralxac'al max wab numnoni.

¹³A yet ak'balil yet chi tit numnaj wayan eb anima, ay junok in wayich max oqui.

¹⁴Max ajwal can xiwc'ulalil win; masanil in mimanil max bilajok.

¹⁵Axca junok pixanej max ec' matxatxok yin in sat, toxac'al max aj wan in xil yuj.

¹⁶Axq'uijanxac'al tol ay junok mactxel ayic' bay tu', max oc waan in satak axca junok enelej. Palta maj je' wal wilon yin. Yinxac'al c'ojanc'ulal max yun yoc nuk' max wabej:

¹⁷¿Chi mi je' tol tojolxac'al chi yut ba junok anima satak Dios? ¿Chi mi je' tol c'amxa jabok is mul satak Cham is watx'nemal?

¹⁸Toltax a eb chekbej Dios bay satcan c'am wal oc eb yipok c'ul Cham; toltax eb ángel ay is tacnakilal eb chi ilchaj yuj.

¹⁹Akxa wal eb anima tol c'am jabok is yipalil, lajan eb axca junok xan na, tol asanc'al yiban pokok watx'nebil ajok. Chi je'c'al tec'lay ay eb axca tzolol ij.

²⁰Asan ch'an nan xol k'inibalil yetok yayc'ualil chi lajwi ayok; chi cam yin junelnej, tokwal ay mactxel ok cus yuj.

²¹Chi lajwi yiquisal axca chi yun yayc'ay junok mantiado yet chi c'uplay is tx'anil. Chi camaj yin tol c'am chi chaloj jelanilal yuj, ẍi jun pixanej tu'.