Read Q'anjob'al Job 40 Bible Online

Job 40 - Q'anjob'al bible

Job 40

¹Max yalon pax Jehová bay cham Job:

²Ach Job, max yochej a c'ul a teyelen a ba wetok ayin tol chic'al je' wuj masanil, ¿tom mimantoc'al tzet chal win? Tak'wan ayin xin, ẍi Jehová.

³Max tak'wi Job bay Cham:

⁴¿Tzet wal ok yun in tak'wi ayin tol c'am welapnok ti'? Yelxac'al mi watx' tol c'am tzet chi wala'.

⁵Mayal quin k'anjab junel cayel, c'amxa tzet watx' chi wala', ẍi cham Job.

⁶Max k'anjab pax Jehová junelxa bay cham Job nan xol owal cak'ek', max yalon axca ti':

⁷Tec'baj a ba xin, cax cha paktzen juntzan in k'anlebal ok wal ti':

⁸¿Chi mi wal a tec'baj a ba aloni tol man tojolok in, yet watx' chach eloc yin tol c'am jabok a mul?

⁹¿Tom xiwilxa epalil wintak? ¿Cay mi wal tu' bil yul a nuk' axca wet ti'?

¹⁰Ocan in satak yetok a mimanbilal c'al a mayk'ak'al, tx'ox ekbej c'al tol ay elapnok.

¹¹Chi cam wal elon eb tol chi maynej ba; ak'to wal owal yin eb, cax cheon ay eb.

¹²Chi cam elon c'apaxok baytal ay eb ch'aan, cax choten eb yin yaynakilal; a bay chi chaloj eb yobtakwom oj, cha tec'on can ay eb.

¹³Cha mukcan aytok eb masanil bay yalan tx'otx'; cha makchencan aytok eb bay makancan aytok eb camnak.

¹⁴Caywal tu' ok yun walon ayach tol a yuj epalil xan ok je' a colon a ba.

¹⁵Ocan t'anan yin no Behemot,*fn* ayin max in watx'nej no' tu' axca max ach wut in watx'neni. A no' ti' chi lo no' ac'un axca no wacax.

¹⁶Ilab wali, caw wal ay yip yichin no' c'al yakan no'.

¹⁷A ne no' lajan cawil axca c'ute', axa tx'anil is xub no' caw wal watx' yayji.

¹⁸A is bakil no' lajan wal axca ch'en tubo bronce, a yakan no' axca ch'en hierro.

¹⁹Asan jun ti' yelxac'al c'ayubtak yili xol masanil no no' watx'nebil wuj. Asan in chi je' wak'on c'ayilok.

²⁰A bay satlak witz bay chi sakchi no chiwajwom no' xolak te', a tu' chi waj no' yac'un.

²¹Chi ay cupan no' bay yalanlak yenel te', c'al bay xolak yakan ac'un bay chic'a'.

²²A bay yalan yenel-lak te' tu' chi c'ubaj ba no'; bay xolak te sauce oyan oc bay tilak aej, a tu' ay no'.

²³Caxc'al chi el sequecok a' aej yul is be no', c'am chi xiw no'; caxc'al mi chi oc secnaj masanil a' Jordán yin sat no', c'amc'al tzet chi na no'.

²⁴¿Mac wal junok ok tzakay mitx'on no' ta iquis, no' yuj yaon ec'tok junok tx'an lasu yul txam no'?