Read Q'anjob'al Job 41 Bible Online

Job 41 - Q'anjob'al bible

Job 41

¹Ac'ala' c'apax no Leviatán,*fn* ¿chi mi je' a mitx'on no' yetok ch'en anzuelo? ¿chi mi je' a c'alon ay yak' no' yetok tx'anej?

²¿Chi mi je' aon ec'tok junok tx'an bay yul is txam no', ma aon ec'tok junok gancho bay yalan is ti' no'?

³¿Ok mi wal tewok oc no' ayach yet watx' ay a yabenc'ulal yin no'? Tokwal yetok c'ununial k'anej ok yut yalon no' ayach.

⁴Tokwal ok ak' pural no' aon oc yopiso yin tojbalk'inal.

⁵¿Ok mi je' a sakchi yetok no' axca chi yun a sakchi yetok junok no tz'iquin? ¿Chi mi je' a c'alban ay no' yet chi oc no' sakchobalok eb a cutz'in?

⁶A eb txayilwom ¿ok mi je' txonon eb no'? ¿ok mi je' c'upon coj eb, cax chi pojon ec' eb yin?

⁷¿Chi mi je' yeq'uel julbalej yul is tz'umal no' oj? ¿Chi mi je' yeq'uel ch'en arpón yul jolom no' oj?

⁸Tatol chak'lej a mitx'on no', chach poc'labi yetok, manxa ok tok c'ayc'ulal oj tzet max on yetok no' tu', c'amxa bak'in ok on junelokxa yetok no'.

⁹A mac chi ilon yin no' Leviatán tu' chi pax yip yuj xiwilal.

¹⁰¿Baytal ay junok chi tec'baj ba tx'emon no Leviatán tu'? Akxam wal ayin, ¿mactxel junok chi je' tec'ban ba in satak?

¹¹¿Tok ay mactxel max ak'on ayin yin babelal yet watx' chi je' in tojlanen bay junelxa? Yujtol a masanil tzet yetal wet.

¹²C'am chin bek wak'on binaj yakan no Leviatán tu', c'al yip no', tol c'amxa yalbanil.

¹³¿Mactxel chi je' yion el tz'umal no' ayoc yin tu', ma mac chi je' tekontok junok lanza yul is tz'umal no' tu', tol axca makbal julbalej yayji?

¹⁴¿Mac wal txel ok je' jakon ti' no', yujtol ayxa may yili ye no'?

¹⁵Axa tz'umal yichin no, lajanxac'al yetok makbal julbalej txolanxac'al ocok, tol nububixac'al yayji, caw wal caw axca ch'en ch'en.

¹⁶Nububixac'al yayji oc jun yin junxa, tamwal cak'ek' c'amxa chi je' yeq'uel bay nan xol tu'.

¹⁷Junejxac'al yayji, c'am mactxel chi je' pojon ayok.

¹⁸A yet chi at'iẍli no', lajan wal axca letz'lon; axa yul sat no' tol wal chi jopopi yili axca yakan c'u yet chi k'inibi.

¹⁹A yul ti' no' chi eltek xak k'ak'ej cax chi el tzititok axca k'ak'ej tu'.

²⁰Axa bay yul is txam chi eltek mub, lajan wal axca junok xij tol chi uki xol k'ak'ej.

²¹Cak xayenakxac'al chi yun tzak'ak' yuj yet chi el is cak'ek', cax chi eltek xak k'ak'ej yul is ti'.

²²A is nuk' no' caw wal ay yip, masanil chi xiwaj bay no'.

²³Toltax a is chibejal no' caw wal caw, lajan wal axca ch'en hierro tz'anak tol chac'bil.

²⁴Caw wal caw is pixan no' axca junok miman ch'en, lajan wal axca ch'en ca'.

²⁵Tatol chi tit no' yin eb anima, toltax eb tec'an chi xiwaj eb, caw wal chi xiw eb, cax chi toj eb elajok.

²⁶C'am yopiso ch'en espada, c'al ch'en lanza, tamwal julbalej yet chi oc owal yetok no'.

²⁷A yul sat no', a ch'en hierro lajanc'al axca ch'im, axa ch'en bronce, lajanc'al axca k'ayil te'.

²⁸C'am chi el no' bay junok julbalej; tatol ch'en chi co k'oktok yin no' lajanc'al axca tol matz'il trigo chi co k'oktok bay.

²⁹Ta chi co mak'oc junok miman te' yin, lajanc'al axca tol a junok aj chi co mak'oc yin; toc'al chi oc t'anan no' yet chi yaben no' bil ch'en julbalej.

³⁰Tatol chi jutxtok ba no', chi olchajcan zanja yuj axca bay chi ch'oltok ch'en rastrillo.

³¹Chi somlabi aj pimal a' mar yuj no', axca wal tol chi uki a', lajan wal axca junok xij bay chi somlay suk'uk'i jab.

³²Sakpolinakxac'al chi yun yili a' bay chi ec' no', axca sakil xil jolomej.

³³C'am junokxa tzet yetal bay sat tx'otx' ti' chi je' lajlen ba yetok; a jun no' tu' max in watx'nej yin tol man yojtakok chi xiwi.

³⁴A no' tu' chi oc no' satak junok tol ch'aan chi yut ba; a ton jun tu' reyal masanil no chiwajwom no', ẍi Jehová.