Read Q'anjob'al Job 5 Bible Online

Job 5 - Q'anjob'al bible

Job 5

¹Elokab aw xin ach Job, okto wal jila' mactxel ok tak'wok ayach. ¿Mac wal ángelal ok a k'an is colwal?

²Yob is nabal mactxel chi yak' lajwok ay ba yin toc'al chi alxi, axa sawenal chi ion c'apax el is k'inal.

³Ayin caw max wil eb yob is nabal, max chanaj el eb yich yaj can yin xiwil tzet yetal; palta yinc'al aymanil max jayoc catab yiban eb.

⁴A yuninal eb, c'amxa jabok xewilal chi yila'. A bay satak eb yajaw yobxac'al chi utlay eb, tokwal ayto mac chi colon el eb.

⁵A masanil satlak yawoj eb axac'al eb ak'om wajil chi loon aytok, caxc'al xolakxac'al q'uix chi ilay eltek, axa eb jelan yin ioj aytek satej chi iontok is beyomal eb.

⁶A yatakilal man toc'alok chi yalnej aj ba bay sat tx'otx' ti'; a yailal manak yul tx'otx' ti' chi ajolok.

⁷Yulc'al yet eb anima chi yitek yatakilal yiban, axca chi yun yeltek tz'it k'ak' xol junok k'ak'ej.

⁸A tinani' ach Job, ta ayin caytu' wayji axca ach ti', chi mi wal na ba in c'ul satak Dios, chi mi wal in cawxinakil bay.

⁹Yujtol chi yun Cham xiwil tzet yetal tol c'ayubtakxac'al yoqui, c'amxa chi bischaj tzet chi yunej.

¹⁰A Cham chi aontek nab yiban tx'otx' tx'otx', axca tu' chi yun yoc yal mulnajil.

¹¹A Cham chi ion aj can eb yaynakil chi yut ba, cax chi yak'on ayjok ec' eb ayoc yin yailal yin watx'il.

¹²A Cham chi uchontok tzet yetal chi na eb aj nabal, cax chi yak'on ayc'ayok.

¹³A Cham chi ak'on ayc'ay eb jelan yin yob nabalej nabil yuj eb, cax chi yak'on lajwok Cham jelanil eb tu'.

¹⁴Yet wal chuman c'u chi telc'oj eb axca wal tol a yet ak'balil chi ec'jab eb, toxac'al chi ec' matxatxok eb axca tol ak'balil.

¹⁵A Dios chi colon el eb ok'bal c'ul yayji yul k'ab eb chi yochej chi c'ayon elok, chi yiel eb yul k'ab eb etnewom.

¹⁶A wal Cham ayoc yipok c'ul eb tol c'amxa yip, xan chi tz'inji eb yobtakwom.

¹⁷Watx' yet eb anima tol a Dios chi ak'on cuenta; manchak entaknej el is yak'bal cuenta Cham tol chi je' yuj masanil.

¹⁸Ta a Cham chi ak'on yasjok junok mactxel, ac'ala' Cham chi anten paxok. Ta a yetok is k'ab Cham chi ak'on yab yail junok mactxel, a Cham chi ak'on watx'jok paxok.

¹⁹Ok ach col-layc'al el yuj Cham yin xiwil elal bay ay is mayil, man ok cha apnok oc Cham yobtakil en.

²⁰A yul tiempoal wajil ok ach col-lay el yul k'ab camich yuj Cham, ac'ala' yul tiempoal owal ok ach col-lay el yuj bay ch'en espada.

²¹A Cham ok ach colon el bay eb alom k'umal, man ok ach xiwok yet ok jay yatakilal.

²²Toc'al ok ach tzewok yuj wajil c'al yuj yatakilal, cax man ok ach xiw bay no xolakteal no'.

²³A bay ok oc mulnajil c'am ch'en ch'en ok ach etnenok, a no chiwajwom no', watx' ak'on yetok.

²⁴Watx'c'al ak'on bay a na, a yet ok a bison a calnel tz'akanc'al ayic' no'.

²⁵Xiwilxa ok aj can enatil axcaxac'al ch'ib an ac'un bay xolak te'.

²⁶Caw wal yinxac'al icham winakil ok yun a cami, axca chi yun jolay junok topan ixim trigo tol k'inxa.

²⁷A wal co jelanilal chon cuyoni tol axca tu' yayji, yuj tu' chi cam wal abeni c'al a beybalneni, ẍi cham Elifaz.