Read Q'anjob'al Job 8 Bible Online

Job 8 - Q'anjob'al bible

Job 8

¹Max yalon cham Bildad aj Súa:

²¿Bak'in ok a bek a k'anjab axca tu'? Lajanxac'al juntzan a k'anej tu' axca junok owal cak'ek'.

³A Dios, Cham chic'al je' yuj masanil, c'am yechel chi yetnejtok tojolal, tamwal is satak junok mactxel chi yiec'ok.

⁴A eb a c'ajol tu' toc'alta' max oc mul eb satak Dios, yuj tu' xan max yak' Cham yailal yiban eb axca wal is mojalil.

⁵A wal oc a ba yul k'ab Dios, Cham tol chi je' yuj masanil, cax cha k'anon bay tol chi ok' c'ul en.

⁶Tatol watx' a nabal, tojolc'al chot a ba, a Cham ok ach ilonok cax ok yak'on pax ayach masanil a tzet yetal etc'alta'a.

⁷Axa a beyomal yet yalantok, majxa je' lajlen ba yetok tzet yetal ok a cha' yin tzunanil ti'.

⁸K'anlej ab tzet max yal eb max ec'lej yet yalantok, cuy is jelanil eb anima yet payxa.

⁹Ayon ti' axca tol ewito max con alji, tok ay jabok tzet jojtak. A co k'inal bay sat tx'otx' ti' lajanc'al axca junok enelej.

¹⁰Akxa wal eb anima yet payxa, a eb tu' chi je' ach cuyon yin xiwil tzet yetal.

¹¹A te bayal c'al an papiro, asan bay ay aej, a tu' chi ch'ibi.

¹²Ta chi tanaj a' aej, a juntzan tu' jun bek chi takaj yintak juntzanxa ac'un, caxc'al uninto, c'amto chi je' tzoc'lay aj yuj k'anlayi.

¹³Axca wal tu' ok yun eb yobtak tzet chi el yuneni, eb tol chi tojcan Dios c'ayc'ulal yuj, toxac'al chi lajwican ay tzet yetal ayoc yipok c'ul eb.

¹⁴A tzet chi yaoc eb yipok is c'ul tu', lajan wal axca yal ti' no xim.

¹⁵Tatol chi yochej eb chi oc lacan yin jun t'inan yal ti' no xim tu', tokwal ay jabok yipalil; tatol chi oc k'ean eb yin jun yal ti' no xim tu', ¿tokwal man ok t'inchajok?

¹⁶A eb yobtakwom lajan wal eb axca an yax ac'un chi ch'ibaj bay yakan c'u, chi tojc'al lebebok bay xolak awoj,

¹⁷chi tojc'al is xe' yulak ch'en cax chi ch'ibaj yiban.

¹⁸Palta ta ay mac chi ocon aj xin, c'amxa mactxel yojtak tatol max ayji ec' bay tu'.

¹⁹Caytu' chi yun lajwi ayok, tx'okxa ac'unal chi ajol bay max oclay ajtek tu'.

²⁰A Dios, c'am chi beklaycan el junok watx' is nabal yuj, tamwal chi yak' is colwal bay eb yob tzet chi el yuneni.

²¹A Cham ok ach ak'on tzewok junelxa c'al oc yin tzalojc'ulal yuj.

²²Axa pax eb ajc'ul xin, toxac'al ok occan eb yin q'uixawc'ulalil; a yatut eb yobtakwom tu', ok lajwok ayok, ẍi cham Bildad.