Read Q'anjob'al Job 9 Bible Online

Job 9 - Q'anjob'al bible

Job 9

¹Lajwi tu xin, max yalon pax Job:

²Caw wal wojtak sic'libil tol cayton tu' yayji. ¿Palta tok ay mac chi je' yalon oc ba watx'il satak Dios?

³Ta chi jochej chi co teyelej co ba yetok Cham xin, a yin junok mil k'anej Cham, tok ay junok chi je' co paktzeni.

⁴Yujtol a Dios caw wal miman yayji oc Cham yin is jelanil c'al yin is yipalil, ¿mac wal junok chi je' tec'ban ba satak Cham cax c'am jabok tzet chi oni?

⁵A Dios chi yak' bilaj mimek witz yuj yowal c'ul, chi yuchon elok, yin c'am bay chi yala'.

⁶A' chi ak'on bilaj tx'otx' tx'otx' c'al yak'on tz'eylabok aj yichlak.

⁷A Cham chi je' yalon bay c'u tol c'am chi ajolok, c'al chi je' makchen el sat waycan yet c'am chi joplabi.

⁸Tokwal ay mac max colwaj yetok yet max watx'nen satcan, asannej chi tec'on pananbok sat a' mar yet chi aj wan a'.

⁹A Cham max watx'nen juntzan waycan chi yik miman Oso, Orión, yetok Motz yetok juntzan bulquiltak waycan bay yetc'ulal sur.

¹⁰Xiwil tzet yetal c'ayubtakxac'al chi yun Cham, a ton juntzan tzetak yetal tol c'am junok mactxel chi je' nachaj el yuj.

¹¹Ta chi ec' Dios in c'atan, tokwal ok je' wilon yin, chi mi ec' bay tu' tokwal ok nachaj el wuj.

¹²Ta ay tzet yetal chi yiec' Cham bay junok, ¿mactxel ok je' tenon oc wanaj Cham? ¿mactxel ok je' k'anlen bay tzet chi yunej?

¹³A Dios c'am tzet yuj chi oc wanaj yin tx'oxon yowal c'ul. Toltax eb ayoc yetok Rahab*fn* toxac'al chi ay moc'an eb yuj xiwc'ulal xol yakan Cham.

¹⁴¿Baytal ok wi' in k'anej yet chin paktzen k'anej Dios?

¹⁵Caxc'al mi c'am in yobtakil, palta c'am chi je' in tak'wi bay Cham; in juezal yayji ocok, asan tol chin k'an yabenc'ulal win bay.

¹⁶K'inalok ta chi wawtej Cham bay satak beyc'ulal cax chi apni, c'am chi waoc yin in c'ul tol chin is cha k'anjab yetok.

¹⁷A ti' yet, chin mi yak' lajwok yetok junok owal cak'ek' yaxnab, chitoc'al mi in yak' yasjok yin c'am tzet yujal.

¹⁸C'am xam chi je' wion wip junok txolan, chi mi yak'xac'al low win xiwil yatakilal.

¹⁹Ta chi co k'anlej: ¿mactxel yelxac'al ay yip? ta con chi: Tix in ti', ẍi mi Dios. Ta chi jochej chi jabej mac yel chi yala', ¿mactxel ok je' tec'ban ba in satak? ẍi mi Cham.

²⁰Ta chi wala' tol caw wal tojol in, a in k'anej chi tx'oxon elok tol ay in paltail. Ta chi wala' tol c'am jabok in tacnakilal, axa mi Dios chi aloni tol man yelok.

²¹Ayin ti' c'am in mul, palta c'am welapnok yul in sat; c'amxa chi yal in c'ul chin iquisbic'al ec'ok.

²²A chi wut in naoni, lajanxac'al el masanil. A Cham chi ak'on c'ayil eb ay is mul, yetokc'al eb c'am is mul.

²³Ta c'uxan chi jayoc camich yiban masanil anima, tok ay tzet chi na Cham yet chi lajwi ay eb anima c'am is mul.

²⁴Chi cancan jun yulyibank'inal ti' yul k'ab eb yobtakwom yuj Cham, cax chi makay el sat eb juez yuj; ta manak Dios chi yunej, ¿mac pax txel xin?

²⁵Aymanxac'al chi beytoj in k'inal, c'amxac'al jabok tzalojc'ulalil chi wila'.

²⁶Lajan wal chi yun toj xuyuyok axca barco, axca c'apax toj xuynaj no tx'acbaj yintak is chibej.

²⁷Ta chi wochej chi tojcan c'ayc'ulal in yailal wuj, cax chin occan yin tzalojc'ulal,

²⁸chi xiwc'al in c'ul yuj in yailal tu', yujtol wojtak a Dios c'am chin yal watx'il.

²⁹Ta ay in mul yalon Cham, c'am jabok yelapnok yuj chi wak' wip walon tol watx' in.

³⁰Caxc'al mi chin tx'aj in k'ab yetok xapon cax chin tx'ajon wal yetok yal tan,

³¹a Dios chin yac'al aytok xol chic'a'. Toltax in pichil yobxac'al yoc win chi wabej.

³²C'am chi je' paktzen junok animac'al axca ayin ti' bay Dios, tamwal ok je' waloni tol chi je' in toj yetok Cham satak juez.

³³Matawal ay junok chi je' yoc co nanalwomok yetok Cham, tol chi je' yaontok k'ab jiban co cawanil,

³⁴tol yuj, chi oc wanaj yak'on Cham in yailal, c'al in yaon oc yin xiwc'ulal.

³⁵Catatu' chi mi je' in k'anjab yin c'am xiwc'ulalil, yujtol c'am wal in mul chi yabtok in c'ul.