Read Q'anjob'al Sal 10 Bible Online

Sal 10 - Q'anjob'al bible

Sal 10

¹Mamin Jehová, ¿tzet yuj xan najat chach elcanok? ¿Tzet yuj xan cha c'ubaj el a ba yet ayon oc yin yailal?

²Chi mimanej ba mactxel unem yobtakil cax chi oc ajc'ulal yin eb yaynakil anima; palta ac'aloc ok occan yul yal max watx'nej.

³A mac unem yobtakil, a yin is yochwan chi maynej ba, chi tzalojbi c'ul yin eb ayoc yin yob ochwanilal, cax chi yintaknej el Jehová.

⁴A mactxel yobtakwom tu', c'am chi na' yin Dios yuj is luesal. C'am bay txequel ay Dios yul sat.

⁵Watx'c'al chi eloc yin masanil tzet chi yunej. C'am chi nachaj el yuj is beyc'ulalil Dios. Chi yintaknej c'apax el eb ajc'ul oc yin.

⁶Chi na wal yul yet: C'am bak'in chin ayc'ayi, c'am bak'in chin oc yin somc'ulal, ẍinaji.

⁷Chi yalon catab k'anej, lek'tial, c'al xibtebalej. Yin aymanil chi k'anjab eb yetok yowal c'ul, c'al yobtakil.

⁸Chi occan yin makwal bay tilak aldea, cax yin ewantakil chi mak' cam eb c'am mul; ayc'al oc sat yin mac c'am chi je' colon ba.

⁹Axca no coj ayoctok yul nach'en, caytu' chi yut ba. Chi c'ubaj el ba cax chi maklay eb ok'bal c'ul yuj; chi yechbanej janic' wal ok ayc'ay yuj. A yet chi michchaj el yuj, cax chi yiontok.

¹⁰Chi ay moc'anok, cax chi aj jucnajok, axca no coj tu', cax chi ayc'ay eb tol c'am chi je' colon ba yul k'ab.

¹¹A naon jun unem yobtakil tu' tol chi tojcan c'ayc'ulal yuj Dios, cax makan el sat Cham yaloni, cax c'am chi yila'.

¹²Mamin Jehová, ajan wanok. Ak' ep. Manchak tojcan c'ayc'ulal oj eb ayoc yin cusc'ulal.

¹³¿Tzet yuj xan chach intaknelay el yuj eb yobtakwom? A naon eb tol man ok a beyc'ulnej eb.

¹⁴Ti wal ach caw max el is yobtakwomalil eb. Ach wal max ela', xan tol ok ak' is mojalil bay eb yin yailal. A ayach chi yal ba eb c'am chi je' colon ba. Ach chach colwaj bay eb unin c'amxa mam, c'amxa txutx.

¹⁵Mak' k'aj is k'ab eb unem yobtakil xin. Ak' yowalil is yob unben eb tu'. Yinokab tz'akanil chi tojlanej el eb is mul.

¹⁶Ach Jehová, Rey ach yin tojbalk'inal. A eb conoblak ok ilay el eb yul a tx'otx'.

¹⁷Mamin Jehová, ach ton wal chab is txaj eb yaynakil anima; ach ton wal cheptzej eb. Ach ton chab bay chi yal ba eb chi etnelayi, c'al eb unin c'amxa mam, c'amxa txutx. Ach ton ok el tzet ok yuncan eb yobtakwom tol cambejal yayji, yet watx' c'amxa chi xibtej eb eb yaynakil.