Read Q'anjob'al Sal 102 Bible Online

Sal 102 - Q'anjob'al bible

Sal 102

¹Ab wal jun in txaj ti' Mamin Jehová, chi yochej in c'ul chi apni yel waw ayach tu'.

²Manchak ach el tx'uman ayin yet ayin oc yin bilc'ulalil. Elokab yin a c'ul quin abeni; yinokab aymanil chin a tak'wej yet chach wawteni.

³Lanan lajwi ay in k'inal, axca wal c'ayaj mub; lanan tz'atok in bakil chi wabej, cax axca tol tzak'ak' chi oc yin.

⁴C'amxa yip in c'ul; axca wal takin ac'un in tinani'. C'amxa chi tit in wajil.

⁵Mayal oc lotzan in tz'umal yin in bakil yuj xiwil chin c'uyuyi.

⁶Lajan in yetok junok tonton bay tz'inan tx'otx', ma axca no xotx' bay k'alak na.

⁷C'am chi oc in wayan. Lajan in axca no tz'iquin chi ec' tx'oklil bay chonlak na.

⁸A eb ajc'ul oc win, cac'al ti' tx'emon cus eb in c'ul. Chin yak' binaj eb yet chi yalon eb is catab.

⁹Axca tol tik'ak'il tan in lobej chin lo'; chi somchajtok yal in sat xol wuc'a',

¹⁰yujc'al a k'ak'alc'ulal, c'al yowal a c'ul win. Max in eon aj wan, yet watx' chin a k'okayok.

¹¹Axca junok ewan lananxa c'ayajok, caywal tu' in k'inal. Lanan in takcan el chi wabej, axca wal an ac'un.

¹²Axa pax ach Jehová, Yajaw ach yin tojbalk'inal. Toc'alta' ok ach nalaytek.

¹³Ajan wanok, cusokab aj a c'ul yin Sión; mayal jay tiempoal ak'on yabenc'ulal yin.

¹⁴Ay co camc'ulal ayon a chekbej on ti' yin ch'en ch'en yet Sión, xan ya' chi jabej, yuj max etaxcantok.

¹⁵Masanil mimek conob, c'al eb cham reyal tx'otx' tx'otx' ti', ok xiw eb bay is mimanbilal, c'al is mayk'ak'al Jehová.

¹⁶Yet ok ca watx'nelay aj Sión, cax ok tx'oxon aj ba Cham xol is tzekekial bay tu'.

¹⁷Ok cha Cham is txaj eb c'am mac chi oc yetok, cax man ok tenchanej eb yet ok yalon ba eb bay.

¹⁸Tz'ibchajokab can jun ti' yul un yet watx' ok yal eb manto aljok is watx' k'anej bay Jehová.

¹⁹Atac'al bay is cajlobal Jehová bay satcan max yiltek tx'otx' tx'otx' ti',

²⁰yuj chi watx'nej yayji is k'akawil eb presowom. Chi ul colcan el Cham, eb t'inan chi cami,

²¹yet watx' chi el yabixal bay Sión cax chi al-lay watx' k'anej yin Cham bay Jerusalén,

²²yet ok jay masanil nacionlak ul yaon ay ba bay Cham.

²³Max yican el Jehová wip yet nanto in k'inal.

²⁴Max wal bay Cham: Ach in Diosal, manchak in etok yet nanto in k'inal. ¡A wal a k'inal ach ti', c'am is lajub!

²⁵Atax yet yichbanil max a watx'nej ay yich tx'otx' tx'otx' ti', cax ach wal caw max a watx'nej satcan.

²⁶Ok c'aycan el masanil juntzan ti'; axa ach xin, toc'alta' ayach ec'ok. A juntzan tu' ok ichambok axca yichambi an pichilej; cax ach ton ok a q'uexcan elok, axca wal q'uexon el anima icham pichilej, cax chi k'okoncan el eb.

²⁷Axa ach xin, ac'ala' achc'al, c'am bak'in ok lajwok a k'inal.

²⁸A eb juninal ayon a chekbej on ti', ok ayjok eb a satak yin junc'ulalil; yuj a colwal xan c'am tzet ok on eb.