Read Q'anjob'al Sal 103 Bible Online

Sal 103 - Q'anjob'al bible

Sal 103

¹A ton bit David ti' Yin masanil in c'ul, c'al yin masanil wanimail chi wal watx' k'anej bay Jehová.

²Yin masanil in c'ul chi wal watx' k'anej bay Jehová, cax man ok tok c'ayc'ulal wuj is watx'c'ulalil Cham ayin.

³A wal Cham chi ak'on tan masanil in mul. A' chi ak'on jay in c'ul yin masanil ilya'.

⁴A Cham chin colon el bay mukbanil camnak. A' chin camc'ulneni, c'al yok' is c'ul win.

⁵A Cham chi ak'on masanil tzet yetal watx' ayin, cax chin ach'ejbi el yuj axca no mimek tx'acbaj.

⁶A Jehová chi beyc'ulnewi yin tojolal bay eb chi etax yuj eb yaxc'ayinak c'ul.

⁷Max tx'ox Cham is beybal c'al is yunben bay Moisés c'al bay ayon is conob on ti'.

⁸Caw watx' is c'ul Jehová cax c'un yok' is c'ul jin. Man c'unok tit yowal, xiwil is yabenc'ulal.

⁹Man ok on tzu' Cham yin coc'takil, c'am chi chichon oc c'ul jin yin tojbalk'inal.

¹⁰Maj yak' co tojlanej co mul, c'al co yobc'ulal, atac'ala' is mojalil.

¹¹Yel wal miman is camc'ulal bay eb ay yelapnok Cham yul sat, axca wal canil bay ayaj satcan yiban tx'otx' tx'otx' ti'.

¹²Najat max yican el Cham co mul co c'atan, axca najatil bay chi ajol c'u, masantac'al bay chi toj c'u.

¹³Axca yok' c'ul junok mamej yin yuninal, caywal tu' chi yun yok' c'ul Jehová yin eb ikem.

¹⁴Yojtak Cham tzet max yun co watx'ji, yojtak sic'libil tol pokok on.

¹⁵Axca k'inal an ac'un, axcac'al tu' co k'inal ayon anima on ti'; chi ajol an, cax chi xumacli;

¹⁶chi jay owal cak'ek' yin an, axa camay an tu'. C'am mactxel chi aben tzet max yun an.

¹⁷Axa wal camc'ulalil Jehová, ayc'al ec' yin tojbalk'inal bay eb ay yelapnok Cham yul sat. Chic'al yun is ti' Cham bay yinatil anima eb chi iken is trato,

¹⁸cax c'am chi bekay eb yikemal bay Cham.

¹⁹A bay satcan max watx'nej Jehová is trono, cax chi yajawbi yiban masanil.

²⁰Ex ángel caw tec'an e waayi, alek e watx' k'anej bay Jehová, ti wal ikem ex e yaben tzet chi yala'.

²¹Masanil ex satcanil chekbej, alek e watx' k'anej bay Jehová, ti wal yikem ex bay yochwan Cham.

²²Yalokab watx' k'anej bay Jehová masanil tzet yetal esnebil aj bay masanil is makbej. ¡Yin masanil in c'ul ok wal watx' k'anej bay Cham!