Read Q'anjob'al Sal 104 Bible Online

Sal 104 - Q'anjob'al bible

Sal 104

¹Yin masanil in c'ul ok wal watx' k'anej bay Jehová. Ach Jehová in Diosal, yelxac'al tol miman ayji ocok. A a tzekekial, c'al a mayk'ak'al max oc a pichilok.

²A sakk'inal chach pichoni. Ach max a jenbajtok satcan axca junok mantiado.

³Ach max a watx'nej ay a na yiban aej. A ton asun chi oc a carruajeok, chach ec' xuyuyok yiban cak'ek'.

⁴A cak'ek'lak chi occan a chekbejok, axa xak k'ak' k'ak'ej chach ak'on serbil.

⁵Max acan oc tx'otx' tx'otx' ti' yiban is batxlub yet watx' c'am bak'in chi elcan bay ay.

⁶A a' miman mar makchenen tx'otx' tx'otx' ti', cax axca tol is pichil tx'otx' yayji. A a' aej makchenen ay mimek witzlak.

⁷Palta ach max a tzu a', cax max elaj a'; ayman max tojcan a' yet max yaben a' yul a nuk' axca bil c'u.

⁸Max eq'uel a' chonlak witz', max tojcan a' bay jobelak; a bay max a tx'oxcantok, a tu' max ayji ec' a'.

⁹Max acan ay is mojonal, yet watx' c'am chi eq'uel a' bay jun mojon tu', yet watx' c'amxa chi makchej ay a' tx'otx' tx'otx' junelxa.

¹⁰Ach chatek a' aej ay is nuk'lak, yetok a' mimek aejlak chi eq'uel nanlak mimek witz.

¹¹A ton a' tu' bay chi yuc'a' no xolakilteal no'; chi ec'tok takintial no xolakteal burro yuj a'.

¹²A bay tilak a' miman aej chi watx'nej no tz'iquin is wayub; a xol k'ablak te' chi ok' no'.

¹³Atac'al bay a na bay satcan tu' chatek nab yiban witzlak. Chaon aytek mimek yax nab, cax chi satni awoj sat tx'otx' tx'otx' yuj a'.

¹⁴Chak'on ch'ib an ac'un yet watx' chi lo no no', yetok junal awoj chi jawa' cax chi yak'on tx'otx' tx'otx' co lobej.

¹⁵A ton vino tol chi ak'on tzaloj co c'ul, c'al aceite chi ak'on jopchaj co sat, axa ixim loj chi aon oc jip.

¹⁶Chi yaxbi el masanil te te' yuj nab, c'al masanil te c'ute' max yaw Jehová bay Líbano.

¹⁷A tu' chi watx'nej no coc' tz'iquin is wayub, axa no' julom txay, a tu' cajan ec' no' chonlak taj.

¹⁸A bay mimek witz cajan ec' no xolakteal chiwo, axa yulak nach'en cajan ec' no icham.

¹⁹Max a watx'nej xajaw, yet chi oc yin bisbalejal; yojtak c'u janic' ok c'ubaj el ba.

²⁰Chak'on jay k'ekk'inal yet ak'balil, axa yeltek no xolakteal no' tu'.

²¹Chi ok' no coj yuj is chibej, chi k'anon no' lobej bay Dios.

²²Axa yet chi ajol c'u xin, chi toj no'; axa bay is nach'en no' chi ay cupan no' wayi.

²³Axa eb anima chi eltek, cax chi toj eb bay is mulnajil; a tu' chi mulnaj eb yet chi ec' c'u.

²⁴Mamin Jehová, c'amxa chi bischaj tzet max a watx'nej; yin a jelanil max esnej aj masanil. Xiwilxac'al tzet max a watx'nejcan bay tx'otx' tx'otx' ti'.

²⁵Tix a' mar tu', miman sat a', najatta chi apni a'. A bay a' tu' c'amxa chi bischaj no no' ay yul a', ay no mimek, ay no yaliẍ.

²⁶A bay a' tu' chi ec'jab barco; a tu' ay no miman Leviatán max a watx'nej, cax chi ec' no' yul a' mar.

²⁷Masanil juntzan no' tu', ayc'al oc sat no' en ach Dios, tol ach chak' lobej no' yet ay wajil no'.

²⁸Chi ton ak' bay no', axa no' chi ion ajok; elbej yel oj, cax chi loon no' tzet yetal watx'.

²⁹Ta chebaj el a sat bay no', chi xiwcan aj c'ul no', chi cam no', cax chi occan no' pokokal junelxa.

³⁰Ta chak' yiquisal no', chi jobchaj no', cax chi watx'ji yili tx'otx' tx'otx' ti'.

³¹A tzekekial Jehová, ayc'al ec' yin tojbalk'inal. Ay is tzalojc'ulal Cham yin tzet max yesnej ajok.

³²Chi bilaj tx'otx' tx'otx' ti' yet chi oc t'anan Cham yin tx'otx'. Chi aj mubal witzlak yet chi oc mitx'an k'ab Cham yin.

³³Yak'ban iquis in ec'ok, ok in bitnej bit bay Jehová in Diosal.

³⁴Matawal chi yak' tzaloj c'ul Jehová yin juntzan in nabal ti'; asan yin Cham ay in tzalojc'ulal.

³⁵C'ayokab aj eb yobtakwom bay tx'otx' tx'otx' ti', c'al eb man watx'ok, yetzanxa yiquisbi ec' eb. ¡Ayin ti', yin masanil in c'ul ok wal watx' k'anej bay Jehová! Al-layokab watx' k'anej bay Cham xin.