Read Q'anjob'al Sal 105 Bible Online

Sal 105 - Q'anjob'al bible

Sal 105

¹Alek yuj diosalil bay Jehová, alek el is yabixal, alek el bay conoblak yuj yunben.

²Bitnanek bay Cham, alek el is yunben tol c'ayubtak.

³Tzalojanek yintak Jehová, ayokab tzalojc'ulal yin eb ayilwom bay.

⁴K'anek is colwal Jehová, aek ay e ba bay Cham yin tojbalk'inal.

⁵Ayon yinatil on Abraham is chekbej Jehová, ayon yinatil on Jacob sic'bil on el yuj, co naektek is mimek yunben Cham tol c'ayubtak, yetok juntzan ley albilcan yuj.

⁷A Jehová co Diosal, a Cham chi yajawbi bay masanil tx'otx' tx'otx' ti'.

⁸Toc'alta' chi yun is trato Cham. Toc'alta' chi yun is yalben bay xiwil milal is makquiltakil anima chi ec'lej.

⁹Max yun is trato bay Abraham, c'al is ti' max yak' bay Isaac.

¹⁰A is trato Cham yetok Jacob jichmam ayon conob Israel on ti', max yaon oc Cham yin leyalil yin tojbalk'inal.

¹¹Max yalon Cham: Ok wak' tx'otx' tx'otx' yet Canaán ayach, ok occan a satakok, ẍi Cham.

¹²Jaywannej eb yet tu', ec'jabwomc'al yayji eb bay tx'otx' tx'otx' tu'.

¹³Toc'al chi ec' cajan eb bay junjun conoblak, c'al bay is makbej eb rey.

¹⁴Palta maj yal c'ul Dios max etnelay eb, xan max tenchanelay eb rey yuj, cax max yaloni:

¹⁵C'am che yetnej eb in sic'bil elok, man e yetnej eb in chekbej, ẍi Cham.

¹⁶Max yitek Cham mimek wajil bay jun tx'otx' tu', cax max yican el masanil tzet chi lo eb.

¹⁷Palta xin, yin ayoktoc'al max chektok Dios José satak eb, jun max txonlay el yin mosejal.

¹⁸Max yasjitok yakan nak yuj ch'en cadena, max c'al-laycan nuk' nak yetok ch'en,

¹⁹masantac'al max yal yunen tzet max yalcan el nak, cax max tx'oxon Jehová tol yelton tzet max yal tu'.

²⁰A cham rey, is yajawil xiwil anima, max jakon eltek José bay yul preso.

²¹Max alay oc yin patronejal, c'al yin yajawil bay is yatut cham, a chi ilon masanil tzet ay bay.

²²Max cuywaj bay eb yajaw, cax max jelaycan eb icham winak yuj.

²³Yinxa tzunanil max jay Israel, a ton Jacob bay Egipto, cax max ayji ec' bay tx'otx' tx'otx' eb yinatil Cam yin ec'jabwomal.

²⁴A Dios max ak'on mimanbok bisil is yinatil; yelxac'al tec'an waay eb yintak eb aj Egipto.

²⁵Palta a Dios max ak'on yun eb aj Egipto tu' yin yoc ajc'ulal yin is conob, cax chi etnelay eb is chekbej tu'.

²⁶Axa Dios max chektok is chekbej, a ton Moisés c'al Aarón, cham sic'bil el yuj.

²⁷A eb max tx'oxon milagro yet Dios bay eb aj Egipto, a ton tzet c'ayubtak max yun eb bay tx'otx' tx'otx' eb yinatil Cam.

²⁸Max yatek Dios k'ekk'inal bay masanil is makbej, palta eb aj Egipto maj cha yab eb is k'anej.

²⁹Max chic'bi el masanil mimek aej ay bay eb, cax max yak' cam is txayil a'.

³⁰Max yak'on noj conob Egipto yuj no pekey, toltax max ajtok no' sat tx'at cham rey.

³¹Max yalon Dios, cax mubxac'al max yun jay no aja'. Yuj k'anej Cham, xan max ayji ec' no us yul masanil makbej tu'.

³²Mimek sakbat max titc'ay satcan q'uexelok nab; xiwil max mak'waj c'u yul is tx'otx'al eb.

³³Max lajwi ay is yawoj eb, c'al te yigo eb; max lajwi ay k'ablakil te' bay tu'.

³⁴Max yalon Dios cax max apni oc no chapulín. C'amxa chi alchaji jantak no' max jayocok.

³⁵Max lajwi el masanil ac'un yuj no'; masanil tzet yetal max ch'ib bay tu', max lajwi yuj no'.

³⁶A bay Egipto tu' max yak' cam Cham eb babel unin bay junjun na.

³⁷Lajwi tu xin, max yiontek Dios is conob, miman ch'en oro c'al plata max yi eb; c'am junok tol c'am wal yip xol eb.

³⁸Caw wal max xiwaj eb aj Egipto yuj eb, xan max tzaloj aj c'ul eb yet max yilon toj eb aj Israel tu'.

³⁹A Dios max makchen ay eb aj Israel yetok asun; axa yet ak'balil ayoc Cham is tzektebalok eb.

⁴⁰Max k'anon eb chibej, xan max yatek Cham no ub bay eb. A ton loj yet satcan max ak'on noj c'ul eb.

⁴¹Max ay nan ch'en miman ch'en yuj Cham, max tit secnaj a' miman aej yin ch'en. Max beytok a' axca junok miman aej bay tz'inan tx'otx'.

⁴²Max natek Cham is yalben tol miman yelapnok max yalcan bay Abraham is chekbej.

⁴³Tix ton wal ti' max yun yion eltek Dios is conob sic'bil el yuj tu' bay Egipto nan xol aw yet tzalojc'ulal.

⁴⁴Cax a is tx'otx' juntzanxa conoblak max yacan oc yul k'ab eb, yetokc'al masanil tzet watx'nebil yuj juntzan conoblak tu'.

⁴⁵Cay wal tu' max yun Cham, yet watx' ikem eb bay is leyal, c'al bay is cuybej. ¡Al-layokab watx' k'anej bay Jehová!