Read Q'anjob'al Sal 106 Bible Online

Sal 106 - Q'anjob'al bible

Sal 106

¹¡Al-layokab watx' k'anej bay Jehová! ¡Alek yuj diosalil bay Cham, yujtol watx' Cham! C'am bak'in chi lajwi is camc'ulal.

²¿Mactxel ok tzakay yalon el yunben Jehová tol c'ayubtak? ¿Mactxel ok je' yuj bitnen Cham axca wal is mojalil?

³Tzalojc'ulal yet eb chi ikenc'al is chekbanil Cham, cax chi beybalnen tojolal.

⁴Chin a natek Mamin Jehová, yet ok ak'on watx'c'ulalil bay a conob. Na intek yet ok ach jay colwal,

⁵yet watx' watx'c'al ok yun wilon a watx'c'ulalil bay eb a conob sic'bil el oj, yet chi wak' tzaloj in c'ul yetok eb, cax chin maynen in ba yetok a conob ti'.

⁶Lajan max yun yoc co mul yetok eb jichmam. Max on oc yin ec'nakilal; yob max junej.

⁷A yet max ec'lej eb jichmam bay Egipto, c'am yelapnok is mimek yunben Jehová yul sat eb. Max tojcan c'ayc'ulal is miman camc'ulal yuj eb. Max oc eb yin tenomtakil bay Cham bay ti a' Cakyin Mar.

⁸Axa Cham max colon el eb, cax max tx'oxon el is yipalil, yet watx' c'am tzet chi al-lay yin.

⁹Max tzulay a' Cakyin Mar tu' yuj Cham, cax max takcan ajok. Max yi ec'tok is conob nan yul a' mar tu', axca tol takin tx'otx' bay max eq'uel eb.

¹⁰Tix max yun col-lay el eb tu' yul k'ab eb ajc'ul chi chichon c'ul yin eb.

¹¹A a' mar max makchen ay eb ajc'ul tu'; c'am junok eb max eli.

¹²Catawal tu' max yaon oc eb yalben Dios yin c'ul; cax max yalon eb watx' k'anej yin bitalil bay Cham.

¹³Palta yin aymanil max tojcan c'ayc'ulal yunben Dios yuj eb. Maj yechbanej eb yilon tzet chi na' Dios yin eb.

¹⁴Axa bay tz'inan tx'otx' tu', max tx'em eb Dios. Yuj wal is pek'al eb, xan max ak'lay porobal Cham yuj eb.

¹⁵Max ton yak' Dios tzet chi yochej c'ul eb tu'; palta max yatok jun mimek camich xol eb.

¹⁶A bay cajan eb, yob max na' eb yin Moisés c'al yin Aarón tol sic'bil el yuj Jehová.

¹⁷Yuj tu xin, max jakchaj tx'otx' tx'otx', cax max turlaytok Datán c'al Abiram, yetokc'al eb ajun yetok eb.

¹⁸Max toj jun k'ak'ej xol eb masanil, axa eb unem yobal tu' max tz'atok.

¹⁹A bay tzalan Horeb max watx'nej eb jun yechel wacax tol oro, cax max yaon ay ba eb bay.

²⁰Max bekcan eb Diosal tzekekial, yuj tojcan eb yintak jun yechel no wacax loom ac'un.

²¹Max toj c'ayc'ulal Dios is Colomal eb yuj, a ton Cham xiwil tzet max yun bay Egipto.

²²A bay makbej eb yinatil Cam, c'ayubtak tzet max yun Cham, cax tx'okxa tzet yetal max yun bay a' Cakyin Mar.

²³A Dios max na' tol chi c'aylay el eb, axa Moisés sic'bil el yuj, max tewi yuj eb, xan max ec'cantok yowal Dios, cax majxa c'aylay el eb yuj.

²⁴A yet max beytok, max yintaknej el eb jun tx'otx' watx' yili, maj yaoc eb yalben Dios yin c'ul.

²⁵Max alxi eb yin Jehová bay cajan eb; maj ton yikej eb bay tzet max yal Cham.

²⁶Xan max yak' Dios is ti' yin eb, max yalon tol ok cam eb yuj bay tz'inan tx'otx',

²⁷cax ok ak'lay cam is yinatil eb, cax ok alaytok eb bay tx'ok conobal.

²⁸Max yaon oc ba eb yin ayilwomalil bay Baal-peor, axa chion eb xajanbal chi ak'lay bay juntzan dios man iquisok tu'.

²⁹A yetok is yob unben eb max tx'emon eb Dios, axa yaj can jay camich xol eb tu'.

³⁰Axa yaj wan cham Finees, max yak'on cam jun ay mul, axa yoc wanaj camich tu'.

³¹Max oc tzet max yun tu' is watx'ilok cax manc'al ok tok c'ayc'ulal yuj Dios.

³²Ac'ala' bay a' aej yet Meriba max tx'emtek eb conob yowal Jehová; yujc'al eb xin, xan yob max eloc Moisés.

³³Max tx'emlay tac c'ul Moisés yuj eb, xan max yal cham k'anej yin c'ayc'ulal.

³⁴Maj yak' cam eb israel juntzan conob tol t'inan cam yalon Jehová.

³⁵A ti' yet eb, max junanej ba eb yetok eb tx'ok conobal, cax max cuyontok eb is beybal eb;

³⁶cax max yaon ay ba eb bay yechelej yet eb conoblak tu'. A wal yuj jun ti' xan max etax el eb.

³⁷A bay eb demonio max yak' eb is c'ajol c'al is cutz'in yin xajanbalil.

³⁸Max pulcantok chiq'uil eb unin tol c'am mul, a ton chiq'uil is c'ajol eb, c'al is cutz'in eb. A bay diosal eb aj Canaán max yak' eb yin xajanbalil, axa tx'otx' tx'otx' max etaxtok yuj chiq'uil tu'.

³⁹Max yetnejtok ba eb yuj is yob unben eb; max oc mul eb bay Jehová.

⁴⁰Max caktzaj tit yowal Cham yin is conob, cax max yala' tol manxa is conobok eb.

⁴¹Max beklaycan eb yul k'ab eb tx'ok conobal, cax max cancan eb yul k'ab eb ajc'ul tu'.

⁴²Max cancan eb yalan yuj eb ajc'ul; max ayc'ay eb yul k'ab eb.

⁴³Xiwil el max col-lay el eb yuj Jehová; palta c'am chi yochej eb tzet nabil yuj Cham; max tec'al toj eb yin mulej.

⁴⁴Palta xin, a yet max yilon Jehová is yailal eb, cax max yaben is txaj eb.

⁴⁵Max natek Cham is trato yetok eb, axa q'uexon is c'ul tu' yin eb, yujtol yel miman is yabenc'ulal Cham.

⁴⁶A Cham max ak'on yun eb ajc'ul, yet watx' watx' chi yut eb c'ul yin eb.

⁴⁷Ach Mamin Jehová co Diosal, colon elok. Ion eltek bay nacionlak, yet watx' chi jal co watx' k'anej ayach, yet watx' yin tzalojc'ulal chach co bitnej.

⁴⁸¡Al-layokab watx' k'anej bay Jehová co Diosal ayon Israel on ti' yin tojbalk'inal! Yunokabi, ẍiokab eb masanil. ¡Al-layokab watx' k'anej bay Jehová!