Read Q'anjob'al Sal 107 Bible Online

Sal 107 - Q'anjob'al bible

Sal 107

¹Alek watx' k'anej bay Jehová yujtol watx' Cham, tol ayc'al camc'ulal Cham yin tojbalk'inal.

²Maquex colbil exxa yuj Cham, alek tol max ex col-lay el yul k'ab eb ajc'ul,

³tol max ex wajbaj eltek Cham bay conoblak bay chi ajol c'u, c'al bay chi toj c'u yetokc'al bay norte c'al bay sur.

⁴Ay mactxel chi ec'jabtok xol takin tx'otx' bay c'am be, xan c'am chi ilchaj beal junok conob yuj eb bay chi je' cajay eb.

⁵Ay wajil eb, ay takintial eb, cax toxa wal chi cam eb.

⁶A yuj is yailal eb tu', xan max yal ba eb bay Jehová, axa Cham max colon el eb yin is yailal tu'.

⁷Axa yilaytok eb tu' bay t'inan toj be yet jun conob bay chi je' cajay eb.

⁸Yalokab eb yuj diosalil bay Jehová yuj is camc'ulal, c'al yuj is colwal c'ayubtak yayji ayon anima on ti'.

⁹A Cham chi ion el is takintial mac chi tak ti', cax miman loj chi yak' bay mac ay wajil.

¹⁰Ay mactxel tol cajan ec' bay k'ekk'olinak. A bay cusc'ulal ayoc eb preso, ay pax oc ch'en cadena yin eb,

¹¹yujtol maj yikej eb yalben Dios, cax max yintaknen el eb tzetc'al nabil yuj Cham Axac'al Ocok.

¹²Max alay oc eb yin mulnajil ya'. Chi telc'oj eb, tokwal ay mactxel chi ion aj wan eb.

¹³A yuj is yailal eb tu', xan max yal ba eb bay Jehová, axa Cham max colon el eb yin is yailal tu'.

¹⁴Max yieltek Cham eb xol k'ekk'olinak, cax max yion el Cham ch'en cadena yin eb.

¹⁵Yalokab eb yuj diosalil bay Jehová yuj is camc'ulal, c'al yuj is colwal c'ayubtak yayji ayon anima on ti'.

¹⁶A Cham max coc'bijnentok ch'en puerta bronce, cax max coc'bijnentok ch'en yijul puertalak.

¹⁷Ay mactxel tol ya'ay yuj is tenomtakil, c'al yuj is yobtakil eb, xan ayoc eb yin bilc'ulal.

¹⁸Max yaj can el c'ul eb ixim loj. Toxa chi cam eb chi yut yabeni.

¹⁹A yuj is yailal eb tu', xan max yal ba eb bay Jehová, axa Cham max colon el eb yin is yailal tu'.

²⁰A Cham max aloni, cax max jay c'ul eb. Max col-lay eb yuj Cham bay mukbanil camnak.

²¹Alek yuj diosalil bay Jehová yuj is camc'ulal, c'al yuj is colwal c'ayubtak yayji ayon anima on ti'.

²²Yak'okab eb xajanbal bay Cham yuj aloj yuj diosalil, cax yin tzalojc'ulalil yalokab eb is yunben Cham.

²³Ay juntzan txonjom max toj eb yiban a' mar, max ec' eb yetok is barco yiban a'.

²⁴A bay tu' max yil eb yunben Jehová yin ijinakc'ulal.

²⁵A yet max yalon Jehová, max caktzaj tit yowal a', cax max aj chulnaj a' can.

²⁶Max ilay aj eb can, cax max ilay pax ay eb yuj a', max c'ayc'ul eb yuj is may a'.

²⁷Max ec' k'ek'on eb axca wal uq'uem an, tokwal ayto yopiso is jelanil eb.

²⁸A yuj is yailal eb tu', xan max yal ba eb bay Jehová, axa Cham max colon el eb yin is yailal.

²⁹A Cham max beson el cakxuchum tu', catawal tu' max oc numan a'.

³⁰Max tzaloj aj c'ul eb yet max yilon eb numay a'. Axa Dios max iontok eb bay puerto bay t'inan yapni eb.

³¹Yalokab eb yuj diosalil bay Jehová yuj is camc'ulal, c'al yuj is colwal c'ayubtak yayji ayon anima on ti'.

³²¡Iek can Cham yet chi wajon ba eb conob! ¡Iek can Cham yet chi wajon ba eb icham winak!

³³A Jehová chi q'uexponentok yin takin tx'otx'al bay chi ec' a' mimek aej c'al nuk'lak aej,

³⁴cax chi q'uexoncan oc tx'otx' yax tx'otx' yin c'am tzet chi ch'ib bay. Yuj wal is mul eb anima cajan bay tu' xan caytu' chi yutej.

³⁵A Cham chi q'uexoncan oc takin tx'otx'lak yin najablakil, c'al yin nuk' aejlak.

³⁶A bay tu' chi yak' cajay eb anima ay wajil, cax chi watx'nen eb is mimek conoblak.

³⁷Chi awwi eb sat is tx'otx', chi aj latz'an yawoj eb, cax miman tzet chi yi eb.

³⁸A Cham chi ak'on yaxilal bay eb, cax chi ilay can bisil eb, cax c'am chi aytek bisil is jobbejal no' eb.

³⁹Max aytek bisil eb, yaynakilxa max yuncan eb yuj eb ajc'ul, yuj ilalej, c'al yuj yailal.

⁴⁰C'am yelapnok eb mimek winak yul sat Jehová, max yak'on c'aytok eb bay tz'inan tx'otx' bay c'amxa be.

⁴¹Ac'al Cham max ion el cusc'ulalil yin eb meba', cax max yion aj can bisil yuninal eb axca wal ch'ibaj no calnel.

⁴²A wal yet ok il-lay jun ti', ok tzaloj can aj c'ul eb anima watx' nabal; axa eb anima yob nabal xin, c'amxa tzet ok yal eb.

⁴³A mac jelan, naokab yin juntzan ti', cax nachajokab el is camc'ulal Jehová yuj.