Read Q'anjob'al Sal 109 Bible Online

Sal 109 - Q'anjob'al bible

Sal 109

¹A ton bit David ti' Ach in Diosal, chi wal watx' k'anej en, manchak ach tz'inji el bay in txaj.

²Ilab tol yob chi yal eb yobtakwom naom aj k'anej win, man yelok chi yal eb.

³A is yajc'ulal eb chi aj can wiban, chi oc chian c'ul eb win, tok pax ay in mul bay eb.

⁴A paktzil in camc'ulal, chi oc eb ajc'ulal win, xal in xin, ipan in txajli yuj eb.

⁵A in watx'c'ulal bay eb, max paktzej eb yin yobc'ulalil ayin; axa is paktzil in camc'ulal, a ton is yobc'ulal eb ayin.

⁶A junok cham yob c'ul chaoc yin juezalok; aokab is licenciado, chi ak'on low yin.

⁷Al-layokabi tol ay is mul, yet chi oc beyc'ulal; a is colomal ok ak'on low yin.

⁸C'otxanokab is k'inal, cax tx'okxaokab mactxel chi ioncan is yopiso.

⁹Axa eb yuninal, meba' uninokab chi yuncantok eb, axa yistzil, c'amxaokab yichamil.

¹⁰A eb yuninal ec'okab eb tilak na k'anon low ba; uktelayokab ec' eb bay naben eb tu'.

¹¹Ilayokab tok masanil is tzet yetal yuj nak ak'om tumin yin majanil, ilayokab bey is mulnajil yuj eb tx'ok animail.

¹²C'amokab mactxel chi ok' is c'ul yin nak, tamwal bay is yuninal tol meba'xa.

¹³Tanokab el is yinatil, jolayokab c'ay is bi yin junelnej.

¹⁴Nalayokabtek mul is mam yuj Jehová, cax c'amokab bak'in chi jolayc'ay mul is txutx.

¹⁵Naanokab yuj Jehová is mul eb, cax chi jolayc'ay is nabaniltek eb yiban tx'otx' tx'otx' ti'.

¹⁶Tokwal naan yuj yak'on watx'c'ulalil. A ti' yet, max oc ajc'ulal yin eb meba', c'al yin eb yaynakil anima, c'al yin eb ayoc bilc'ulal yin, masantac'al chi yak' cam eb.

¹⁷Tutun a yobc'ulalil max yochej, catabnelayokabi. Maj yal c'ul watx'c'ulalil; c'amokab bak'in chi cha' watx'c'ulal xin.

¹⁸Aokab yobc'ulalil chi makchen ay axca an pichilej, ocokabtok yobc'ulalil yul is c'ul c'al yul is bakil axca tol aej, ma axca tol aceite.

¹⁹Makayokab el yuj yobc'ulalil axca tol pichilej, cax yin tojbalk'inal chi oc sut'an yin axca tol c'alilej.

²⁰Caywal ti' ok yut Jehová eb ajc'ul oc win, a ton eb chi alon in k'umal.

²¹Axa pax ach, Jehová Wajawil, yunokab alben ayin, cax col in el yuj watx'il a camc'ulal.

²²Puch meba' in, cax manxa animaok ay in c'ul, yas yayji wanimail.

²³Lanan in c'aycan el axca enelej, lanan wilaytok yuj cak'ek' axca no chapulín.

²⁴Lanan bilaj jolom in penec yuj c'amxa chin lowi. Lanan in bakbitok yuj c'am tzet chin chi'.

²⁵Tzeyejal anima wayji. A yet chin yilon eb, chin is buch eb.

²⁶Ocan wetok Mamin Jehová. Ach in Diosal, col in el yuj a camc'ulal.

²⁷Mamin Jehová, yojtaknejokab el eb tol a a k'ab max uten jun ti'.

²⁸C'am yelapnok in is catabnen eb, tanej wal tol a ach chal watx' k'anej win. Elokab q'uixwil eb, yet lanan tzaloj in c'ul ayin a chekbej in ti'.

²⁹Makayokab el eb ajc'ul oc win yuj q'uixwilal, axca tol yetok junok an k'ap k'utilej.

³⁰Ok wal yuj diosalil bay Jehová yin c'am lajubal; nan xol xiwil anima ok wal watx' k'anej yin Cham.

³¹Yujtol a Cham is yalomal eb meba', cax chi colon el eb yul k'ab eb ak'om queja.