Read Q'anjob'al Sal 110 Bible Online

Sal 110 - Q'anjob'al bible

Sal 110

¹A ton bit David ti' A Jehová max alon bay cham wajawil: Ayan chotan bay in watx' k'ab ti' masantac'al ok wacan oc eb ajc'ul oc en batxlubok akan, ẍi Jehová.

²A yuj Jehová ok el yich ekbej bay Sión, masantac'al bay lajub tx'otx'. Ak' cuenta eb ajc'ul oc en, ẍi Cham.

³A yet ok ak'on owal yetok eb ajc'ul, ok jay a conob ayach, yuj ul yaon oc ba yin yak'on owal. Axca wal yal ak'bal yet k'inibalil, axca tu' ok yun jay eb nak ach'ej ayach bay tzalan yet ayilal.

⁴Max yak' Jehová is ti', cax c'am bak'in ok q'uexa'; yalnak Cham axca ti': Sacerdote ach yin tojbalk'inal, axca yopiso Melquisedec, ẍi Cham.

⁵A bay a watx' k'ab ayic' Jehová. Yet jun c'ual ok caktzaj tit yowal Cham, ok yuch c'ay Cham eb rey.

⁶Ok yak' Cham lowbanilej yin eb mimek conob, ok cam anima yuj Cham yinxa bulanil; xiwil eb yajaw ok yak' c'aycan el Cham bay yulyibank'inal ti'.

⁷A yul be ok yuc'a' cham rey bay jun aej, cax ok occan yip cham yuj a'.