Read Q'anjob'al Sal 111 Bible Online

Sal 111 - Q'anjob'al bible

Sal 111

¹¡Al-layokab watx' k'anej bay Jehová! Yin masanil in c'ul ok wal watx' k'anej bay Cham, bay wajan ec' eb anima watx'.

²Yelxac'al tol miman yunben Jehová. A mactxel chi camc'ulneni, chi beyc'ulnej is yunben tu'.

³Watx' yili is yunben Cham, cax mimanbil toni. A is tojolal Cham, ayc'al yin tojbalk'inal.

⁴C'am bak'in chi tojcan c'ayc'ulal yunben Cham tol c'ayubtak yoqui. A Jehová watx' is c'ul, ay yabenc'ulal Cham.

⁵Chi yak' loj bay eb ay yelapnok Cham yul sat. Naanc'al is trato Cham.

⁶Max tx'ox Cham is yunben tol miman bay is conob; max yak' satak eb tx'ok conobal bay eb.

⁷A Cham, chi yunc'al tzet chi yala', cax tojol toni. A is cuybej Cham chi je' jaon oc yipok co c'ul,

⁸yujtol chic'al mayji yin tojbalk'inal. Max yak' Cham is cuybej tu' yuj is tojolal, c'al yuj chi yun tzet chi yala'.

⁹Max colil is conob; max tz'uncan is trato yin tojbalk'inal. A Dios Asanxanej Ocok, cax yelc'al tol ay is may.

¹⁰A yichbanil jelanilal, tol ayokab yelapnok Jehová yul co sat. A eb chi beybalnen is cuybej Cham, caw wal tx'ijan is nabal eb. Toc'alta' chi al-lay watx' k'anej bay Cham.