Read Q'anjob'al Sal 112 Bible Online

Sal 112 - Q'anjob'al bible

Sal 112

¹¡Al-layokab watx' k'anej bay Jehová! Tzalojc'ulal yet anima tol ay yelapnok Cham yul sat. Chi tzaloj c'ul eb yin yiken eb is cuybej Cham.

²A yinatil anima watx', watx' yet eb yuj Dios, cax ok yi eb yikbej bay tx'otx' tx'otx' ti'.

³Xiwil tzet yetal ay bay yatut, beyom toni, axa is tojolal, ayc'al yin tojbalk'inal.

⁴Axca sakk'inal xol k'ekk'inal, caytu' Dios bay be eb anima watx' nabal, bay eb ay yabenc'ulal, eb ay watx'c'ulal, c'al eb tojol.

⁵A anima watx' is nabal, chi yak' majanil yin c'am basilal, axa yin is txon, c'am elk'an.

⁶Yuj wal tu' xan c'am bak'in ok ayc'ayok. A anima watx' nabal tu', ok nalaytek yetc'al bak'in.

⁷Tokwal ay is xiwc'ulalil bay yobal abix. Tec'an waay yuj chi yaoc Jehová yipok is c'ul.

⁸C'am chi xiw c'ul jabok, toltax toc'al chi tzewi yin eb is yajc'ul.

⁹Yin c'am basilal chi colwaj xol eb meba'. A is watx'c'ulal tu', ayc'al yin tojbalk'inal, tol miman ok binaj yuj is yikbej.

¹⁰A eb yob c'ul, chi tit yowal c'ul eb yet chi yilon eb yaj can anima watx' nabal tu'. Chi c'uxay eb ye yin, cax chi c'aycan el eb. A yochwan eb anima yob ok tanilok.