Read Q'anjob'al Sal 116 Bible Online

Sal 116 - Q'anjob'al bible

Sal 116

¹Ay in camc'ulal yin Jehová yujtol max yab in tewilal.

²Yuj max yab tzet max in k'an bay, xan ok wal in ba bay Cham yak'ban iquis in ec'ok.

³Max in yaaytok camich yul is yal. Max jay yailal camich win. Yelxac'al tol max xiwcan aj in c'ul yuj bilc'ulal.

⁴Catatu' max walon in ba bay Jehová. Max in tewi bay yet chi yak' jay in c'ul.

⁵A Jehová, tojol toni, cax ay yabenc'ulal jin. A co Diosal, yelxac'al tol watx' is c'ul.

⁶A chi taynen eb yaynakil. A yet mayal el wip max in is col Cham.

⁷Axa tinani', ayxa in junc'ulal chi wabej yujtol a Jehová watx' max yut c'ul win.

⁸Maj in is cha' cam Cham, max in is col bay ok'ilal, cax maj in is cha' ayc'ayok.

⁹Yak'ban iquis intoc'al, oktoc'al wikej bay Cham.

¹⁰Maxc'al waoc Jehová yipok in c'ul, caxc'al nan xol in miman yailal, max waloni: Caw wal ayc'al tzet chin oni, quin chi.

¹¹Manxa animaok ay in c'ul, xan max wala' tol masanil anima lek'ti' ton eb.

¹²¿Tzet ok wut in paktzen masanil is watx'c'ulal Jehová max yak' ayin?

¹³Ok witek vino yin ofrendail bay Cham, yuj walon yuj diosalil bay, yujtol max in is colo'.

¹⁴A bay satak masanil is conob ok wikej walben bay Cham.

¹⁵Miman yayji oc yul sat Jehová yet chi cam junok tol yet-xa Cham.

¹⁶Mamin Jehová, ayin ton a chekbej in. Ach max in a colcan elok, xan bekan inxa.

¹⁷Ok in paktzej yin wak'on xajanbal yuj aloj yuj diosal ayach, cax ok ach wak'on binajok.

¹⁸Mamin Jehová, ok wak' yun walben ayach satak masanil a conob,

¹⁹bay yamak'il a templo nan xol conob Jerusalén. ¡Al-layokab watx' k'anej ayach!