Read Q'anjob'al Sal 118 Bible Online

Sal 118 - Q'anjob'al bible

Sal 118

¹Alek yuj diosalil bay Jehová yujtol watx' is c'ul Cham; a is camc'ulal Cham ayc'al yin tojbalk'inal.

²Jalokab ayon israel on ti', tol a is camc'ulal Jehová ayc'al yin tojbalk'inal.

³Yalokab eb sacerdote, tol a is camc'ulal Jehová ayc'al yin tojbalk'inal.

⁴Jalokab ayon ay yelapnok Jehová yul co sat ti', tol a is camc'ulal Cham ayc'al yin tojbalk'inal.

⁵Ayin wal oc yin in yailal, max wawten Jehová cax max quin is yabeni, cax max in colchaj el yuj.

⁶Ayic' Jehová wetok. C'am chin xiw yuj tzet ok in yut eb wet animail.

⁷Ayic' Jehová wetok, yujtol in Colomal yayji, xan ok wil yayc'ay eb c'am chin ocheni.

⁸Yelxac'al watx' tol chi jaoc Jehová yipok co c'ul, yintak pax eb jet animail.

⁹Yelxac'al watx' tol chi jaoc Cham yipok co c'ul yintak pax eb yajaw.

¹⁰Maxc'al oymoj masanil nacionlak win, palta yuj yipal Jehová xan max ayc'ay eb wuj.

¹¹Maxc'al oc oyan eb winlak, palta yuj yipal Cham max ayc'ay eb wuj.

¹²Maxc'al oc oyan eb winlak axca wal no noal cab, axa yowal eb max tancan el axca k'ak' ayoc yin takin q'uix. Yuj yipal Jehová max ayc'ay eb wuj.

¹³Max in is tencantok eb yin yaxc'ayinakil, yet watx' chin ayc'ay yuj eb yaloni; palta max jay Cham yuj in ul coloni.

¹⁴Chin bitni bay Jehová. A Cham chi aon oc wip, a Cham in Colomal yayji.

¹⁵A bay yatut eb anima ikem, ay bit yet tzalojc'ulal, yujtol max ayc'ay owal yuj eb. C'ayubtak max yun yipalil Jehová.

¹⁶A yipalil Cham max ak'on ayc'ayok. A yipalil tu' c'ayubtak max yunej.

¹⁷Man ok in camok, palta ok in iquisbok ec'ok, yet watx' ok walil tzet max yun Cham.

¹⁸Miman tz'um max wik yuj Cham, palta maj yal c'ul max in camxac'al.

¹⁹Jakek puertail templo; chi yochej in c'ul chi toj wal yuj diosalil bay Cham.

²⁰A ton jun ti' is puertail bay chon oc satak Jehová; a bay tu' ok octok eb ikem.

²¹Chi wal yuj diosalil ayach Jehová yuj max quin a tak'wej, yujtol in Colomal ach.

²²A ch'en ch'en max yintaknej el eb watx'nem na, a ch'en max oc yin jolom txiquin na.

²³A jun ti' max yun Jehová, cax chi c'ayaj co c'ul yuj.

²⁴A ton jun c'ual ti' max tz'unchajcan yuj Jehová, xan chon tzaloj tinani', chi elxac'al lenaj chi jila'.

²⁵Mamin Jehová, ocan t'anan jin on, cax colon elok, watx'okab chi yun co cancan oj.

²⁶Al-layokab watx' k'anej bay Cham chekbiltek yuj Jehová. Chi jal watx' k'anej ayex mac ex chex jay bay templo Jehová ti'.

²⁷A Jehová Dios toni, a Cham chi tzektanen co be. Chaek k'in, cax quetzektek no xajanbal masantac'al bay txiquinlak altar.

²⁸Chi wal yuj diosalil ayach Mamin, yujtol in Diosal ach, cax chi wal watx' k'anej yuj a mimanbilal.

²⁹Al-layokab yuj diosalil bay Jehová yujtol watx' is c'ul Cham; a is camc'ulal Cham ayc'al yin tojbalk'inal.