Read Q'anjob'al Sal 119 Bible Online

Sal 119 - Q'anjob'al bible

Sal 119

¹Aloj watx' k'anej yin is cuybej Dios Tzalojc'ulal yet eb c'am tzet yob chi binaj yin, cax tzakan eb yintak cuybej Jehová.

²Tzalojc'ulal yet eb chi yikej is tenchebal Cham, cax yin masanil is c'ul chi tzakloj eb yintak.

³A ton eb c'am yobtakil chi yunej, eb chi tzakloj yintak cuybej Jehová.

⁴Mamin Jehová, ach max ala', tol chi ikelay a chekbanil, cax tol yowalil chi yuncan elok.

⁵Matawal chin ayjic'al yin wikemalil bay a cuybej.

⁶¿Tzet yuj xan wal ok q'uixwok aj in c'ul yet ikem in bay masanil a chekbanil?

⁷Ok wal watx' k'anej ayach yetok in nabal tojol yayji, yet mayal cuychaj wuj a ley tojol yayji.

⁸Chi yochej in c'ul chi wikej a beybal. C'am bak'in chin a bekcanok.

⁹A nak ach'ej, ¿tzet wal ok yun beytok nak yin c'am is mul? Asan yin yiken a k'anej.

¹⁰Yin masanil in c'ul chin tzakloj entak. Manchak a cha' wiel in ba yin a chekbanilal.

¹¹Max cam wal in cuyon a k'anej, yet watx' c'am chi oc in mul ayach.

¹²¡Watx' ach Mamin Jehová! ¡Cuyin yin a beybal!

¹³Ok walcan el masanil a ley maxax alcan elok.

¹⁴Chi tzaloj aj in c'ul yet chi wikej a tenchebal, yintak wion pax masanil pojanil beyomalil.

¹⁵Ok in naobtanej a chekbanil max ak' ayon, cax ok cam in c'ul in naobtanen a cuybej.

¹⁶Ok wak' tzaloj in c'ul yin a beybal, cax man ok tokcan c'ayc'ulal a k'anej wuj.

¹⁷Ak' a watx'c'ulal ayin, yet watx' iquis intoc'al, cax ok wikej a k'anej.

¹⁸Jak in sat xin, yet watx' chi nachaj el wuj jantak tzet c'ayubtak yin a ley.

¹⁹Ec'jabwom in bay jun tx'otx' ti', man a c'ubaj el a chekbanil ayin.

²⁰Caw xiwil chi yochej in c'ul chi wojtaknej a ley yin junjun txolan.

²¹Ach ton cha tenchanej eb ch'aan, cax cha catabnen eb chi yican el ba yin a chekbanil.

²²Yuj chi wikej a chekbanil, xan chin a col bay is yob k'anej eb chin intaknen elok.

²³Caxc'al a eb yajaw chi waj nanej eb in yetneni, axa pax ayin a chekbej in ti', a a beybal ok in naobtanej.

²⁴Chi wak' tzaloj in c'ul yuj a tenchebal, tol in cuyomal wal yayji ocok.

²⁵Toxa chin cam chi wabej; ak' in cawil xin, axcac'alta' aloni.

²⁶Max in tx'ox tzetbil in bey a satak, max in a tak'weni; cuyin yin a beybal.

²⁷Ak' in nabal xin, yet watx' chi wikej a beybal; chi yochej in c'ul chin naobtanej juntzan onben c'ayubtak yoqui.

²⁸Tol ayintok yin cusc'ulal, tec'an chin ot in k'ana', axcac'alta' aloni.

²⁹Najat chin ecan el bay beal lek'tial, cax chak'on a watx'c'ulal ayin yin a cuybej.

³⁰Maxax in siq'uil beal yel, cax ay wochwan yin a ley.

³¹Mamin Jehová, tzakan inc'al yintak a tenchebal, manokab oc q'uixawc'ulalil win xin.

³²Ipan wak'on wip wiken a chekbanil, yujtol lanan ak'on in nabal.

³³Mamin Jehová, cuyin yin a beybal, chi yochej in c'ul tol tzakan in yintak a beybal tu' masantac'al yet lajubal.

³⁴Ak' in nabal, yet watx' ok wikej a cuybej. ¡Yin masanil in c'ul chi wochej ikem in bay a cuybej tu'!

³⁵Iintok bay beal a chekbanil, yujtol ay in tzalojc'ulal yin.

³⁶Ak' yun in nabal yin yochen tzet yetal chala', cax manokabnak yin pek'al tumin.

³⁷Manchak in a chatok in tzakloj yintak comon dios. Ak' in cawil xin, yet watx' tzakan inc'al yintak a cuybej.

³⁸Ak' yun juntzan alben ayin a chekbej in ti', a ton juntzan alben bay eb yikem ayach.

³⁹Yujtol watx' a ley yul in sat, xan najat checan el juntzan tx'emwal k'anej ayin, tol chin xiw bay.

⁴⁰Max wochej oc a chekbanil, ak' wiquisal xin, yujtol tojol ach toni.

⁴¹Mamin Jehová, tx'ox ayin a camc'ulal c'al a colwal axcac'alta' aloni.

⁴²Caytu' ok yun in paktzen eb chin tx'emoni, yujtol a a k'anej ayoc yipok in c'ul.

⁴³Ocan wetok yin walon el a k'anej tol yel, yujtol yip in c'ul yayji a ley.

⁴⁴Chi wochej chi wikej a cuybej, cax c'amokab chin bekcan yin tojbalk'inal.

⁴⁵Cata wal tu' chin beytok yin c'am tzet chin tenoni, yujtol tzakan in yintak a chekbanil.

⁴⁶A satak eb cham rey ok wal tzet yetal chala', cax man ok q'uixwok aj in c'ul.

⁴⁷Ay in camc'ulal yin a chekbanil, cax ay in tzalojc'ulalil yuj.

⁴⁸A a chekbanil chin camc'ulnej, cax wochwan yayji; xiwil chin na' a beybal.

⁴⁹Natek alben max al ayin a chekbej in ti'. A a k'anej tu' max ak'can yipok in c'ul.

⁵⁰A' ton chin mimanc'ulnen yin in cusc'ulal; a yin alben ipan ak'on wiquisal.

⁵¹A eb ch'aan, c'am chi bek eb in is tx'emoni; palta c'am chin elcan yintak a cuybej.

⁵²Chin natek a ley yet payxa Mamin Jehová. A yin jun tu' chi wi' mimanil in c'ul.

⁵³A eb chi unen yobal, chi bekcan eb a cuybej, xan chi tit wowal.

⁵⁴A a beybal max waoc in bitok bay sat tx'otx' ti', yujtol ec'jabwom wayji.

⁵⁵Mamin Jehová, chach in natek yet ak'balil, chi yochej in c'ul chin k'aytzej in ba yin a cuybej.

⁵⁶Chi jay in tzalojc'ulal, yujtol chi wikej a beybal.

⁵⁷Mamin Jehová, in satak ayji ocok, toxa max wak' in ti' yin wiken a k'anej.

⁵⁸Yin masanil in c'ul chin na' wak'on tzaloj a c'ul, watx' chot a c'ul win xin, axcac'alta' aloni.

⁵⁹Max in beyc'ulnej in beybal cax max c'oli wiken a tenchebal.

⁶⁰Ayman max wikej a chekbanilal.

⁶¹A eb unem yobal max yay eb yal in satak, palta majc'al tojcan a cuybej yin c'ayc'ulal wuj.

⁶²A yet chuman ak'bal chin aj wan yin walon yuj diosalil ayach yuj a ley, yujtol tojol toni.

⁶³Watx' wak'on yetok eb ayilwom ayach, c'al eb chi iken a chekbanil.

⁶⁴Mamin Jehová, miman txequel a watx'c'ulal bay yulyibank'inal ti', cuyin yin a beybal.

⁶⁵Mamin Jehová, watx' ton max ot a c'ul yin jun a chekbej ti', axcac'alta' alben.

⁶⁶Chi yochej in c'ul chin a cuy yin jelanil, c'al yin ojtakbilal, yujtol a a chekbanil chi waoc yipok in c'ul.

⁶⁷A yet c'amto chi wik tz'um, xiwil bay max wak' c'aytok in ba, axa tinani' xin, chi wikej a k'anej.

⁶⁸Watx' ach ach ti', cax watx'c'al tzet chonej. Cuyinc'al yin a beybal.

⁶⁹A eb ch'aan, chi yalaj eb k'anej man yelok win; axa in xin, chi wikej a chekbanil yin masanil in c'ul.

⁷⁰Max etax el nabal eb yobtakwom, axa in xin, chi wak' tzaloj in c'ul yin a cuybej.

⁷¹Watx' max in el ocok yuj max wik tz'um, tix wal max yun in cuychaj tu' yin a beybal.

⁷²A walon yul wet, tol yelxac'al watx' a cuybej yintak xiwilok ch'en oro c'al ch'en plata.

⁷³Ach wal caw max in a watx'nej. Ak' in jelanil, yet watx' chi cuychaj el a chekbanil wuj.

⁷⁴A eb ay elapnok yul sat, tzalojokab aj c'ul eb yet chin yilon eb, yujtol a a k'anej max waoc yipok in c'ul.

⁷⁵Mamin Jehová, wojtak tol tojol yayji a beybal. A yet chin aon oc yin bilc'ulal, ay ton wal yuj, xan caytu' chotej.

⁷⁶Aokab a camc'ulal chin mimanc'ulneni axca alon ayin.

⁷⁷Tx'ox watx'il a c'ul ayin, cax chak'onc'al in cawil; ay wal in tzalojc'ulal yuj a cuybej.

⁷⁸Elokab q'uixwil eb ch'aan, yujtol chin bajlay yuj eb, caxc'al mi tol c'am in mul. Axa ayin ti', chin naobtanej a chekbanil.

⁷⁹Wajokab ba eb ay elapnok yul sat wetok, eb yojtak tzet chala'.

⁸⁰Watx'okab yayji in nabal yin a beybal, yet watx' c'am bay ok je' in q'uixwi ajok.

⁸¹Toxac'al nanon yec' in c'ul yin janic' ok in a colo'; palta a a k'anej chi waoc yipok in c'ul.

⁸²Lanan yetax el in sat yuj in makon yunen alben. Chin naon axca ti': ¿Bak'in wal ok ach jay yuj in ul a mimanc'ulneni? quin chi.

⁸³Caxc'al mi c'amxa wopiso yuj ichamil, palta c'am chi toj a beybal c'ayc'ulal wuj.

⁸⁴¿Jantakto wal tiempo ok wechbanej a beyc'ulnen eb ajc'ul oc win?

⁸⁵Eb ch'aan, man tzakanok oc eb yintak a cuybej, mayal watx'nej eb olan bay ok in mukay yalon eb.

⁸⁶Masanil a chekbanil yel toni. Ocan wetok xin; ilab c'am in mul yet chi oc eb ajc'ulal win.

⁸⁷Toxa chin cam yuj eb, palta c'am chi tojcan c'ayc'ulal a chekbanil wuj.

⁸⁸Ak' wiquisal xin, axcata' yayji a camc'ulal, cax ok wiken tzet yetal max ala'.

⁸⁹Mamin Jehová, a a k'anej c'am chi q'uexchaji; ayc'al ec' yin tojbalk'inal bay satcan.

⁹⁰Ach ti' chak'c'al yun tzet chal yin tojbalk'inal. Ach max a watx'nej oc yip tx'otx' tx'otx' ti', xan ac'ala'c'al yayji.

⁹¹Masanil tzet yetal ac'ala' yayji, axcac'alta' aloni, cax lanan a k'anbalneni.

⁹²Ta a a cuybej c'am chi yak' in tzalojc'ulalil, mayal xam in lajwi el yuj cusc'ulal.

⁹³C'am bak'in chi tojcan c'ayc'ulal a chekbanil wuj. A yuj a k'anej xan max ak' wiquisal.

⁹⁴Colin el xin, et inc'alta'a, tzakan in yintak a chekbanil.

⁹⁵A eb unem yobal lanan yechbanen eb in c'aylay elok, palta ayin xin, a tzet chala' chin naobtanej.

⁹⁶Max wila' tol c'am tzet yetal watx'xac'al, axa a chekbanil xin, manxa wal watx'ilok.

⁹⁷Xiwil chin camel yin a cuybej. Cac'al ti' in naontek masanil c'u.

⁹⁸A a chekbanil naanc'al wuj yin tojbalk'inal, xan yelxac'al jelan in yintak eb ajc'ul oc win.

⁹⁹Ec'ban in jelanil yintak masanil eb in meẍtol, yujtol xiwil chin na' yin tzet yetal chala'.

¹⁰⁰Yelxac'al tol chi nachaj el wuj yintak eb icham winak, yujtol ikem in bay a chekbanil.

¹⁰¹Maj yal in c'ul max watok in ba bay yob beybalej, yet watx' ikem inc'al yin a k'anej.

¹⁰²Majc'al in besil in ba bay a ley, yujtol lanan in a cuyoni.

¹⁰³Xiwil chial a k'anej chi wabej yintak yal cab.

¹⁰⁴Ay wal in nabal max wi' yin a chekbanil, a xan chi tit wowal yin masanil yob beybalej.

¹⁰⁵A a k'anej in tzektebal yayji yet chin beyi, cax chi tx'oxon in be.

¹⁰⁶Max wak' in ti' ayach ach in Diosal, xan yowalil ok wikej. Ok in k'aytzej in ba yin a ley, tol tojol toni.

¹⁰⁷Mamin Jehová, yelxac'al tol chi cus in c'ul chi wabej; ak' in cawil xin, axcata' aloni.

¹⁰⁸Mamin, cha' in watx' k'anej chi wal ayach yin masanil in c'ul, cax chin a cuyon yin a ley.

¹⁰⁹Toc'alta' ayin oc yin ay is may yet camich, palta c'am chi tojcan c'ayc'ulal a cuybej wuj.

¹¹⁰A eb unem yobal, chi yaay eb in yalil, palta c'am chin elcan yintak a chekbanil.

¹¹¹A tzet yetal chala', a' ayoc in satakok yin tojbalk'inal, yujtol a a k'anej chi ak'on tzaloj in c'ul.

¹¹²Mayal in nabalnej wiken a chekbanil, masantac'al yet lajubal.

¹¹³Xiwil chin cak eb anima cabsat, palta chin camc'ulnej a cuybej.

¹¹⁴Ach ayach oc wenelok, c'al in colbalbaok; a a k'anej ayoc yipok in c'ul.

¹¹⁵Elanek in c'atan ex unem yobtakil, chi yochej in c'ul chi wikej is chekbanil in Diosal.

¹¹⁶Mamin, ak' wip xin, axca yalon alben, cax iquis inc'al; manchak a ten lajwok tzet ayoc yipok in c'ul.

¹¹⁷Ocan wetok, cax ok in colchajok, cata wal tu' ok wikenc'al a cuybej.

¹¹⁸Max a tec'ay eb chi yican el ba yin a beybal, yujtol a is jelanil eb, nabac'al toni.

¹¹⁹Axca wal k'alem yayji eb unem yobal yul a sat, yuj tu' xan chin camc'ulnej a k'anej.

¹²⁰A in mimanil chi bilaj a satak, yujtol chin xiw bay a ley.

¹²¹A yin watx'il, c'al yin tojolal chin beyc'altok; manchak in a bektok yul k'ab eb ajc'ul oc win.

¹²²Ocan yilomalok in watx'ilal; cax manchakokab in yetnej eb ch'aan.

¹²³Lanan yetax el in sat, yuj in makon a jayi yet chi ul in a coloni. Lanan wechbanen in ak'on bekchaj elok, axcata' aloni.

¹²⁴Atac'ala' a camc'ulal, caytu' chot a c'ul win a chekbej in ti'. Cuy in yin a beybal.

¹²⁵A chekbej in ayin ti', ak' in jelanil xin, chi yochej in c'ul chi wojtaknej el tzet yetal chala'.

¹²⁶Mamin Jehová, tiempoxa ak'on cuenta eb yobtakwom; ilab tol max ten eb a cuybej.

¹²⁷Ay in camc'ulal yin a chekbanil, yintak pax ch'en oro yelxac'al watx',

¹²⁸a' xan tzakan inc'al yintak a chekbanil tu', cax chin cakon masanil yob beybalej.

¹²⁹C'ayubtakxac'al a k'anej, yuj wal tu' xan chi wikej.

¹³⁰A yet chi coc' alnelay el a k'anej chon is tzektaneni, chi cuychaj eb yaynakil anima yuj.

¹³¹Xiwil chi yochej in c'ul a chekbanil, axca wal tol chi tak in ti'.

¹³²Ilintek, cax ok' wal a c'ul win, axca wal chot a c'ul yin eb chach camc'ulneni.

¹³³Ikbaj in yin a beybal, axca yalon a k'anej. Manchak in a cha' etax yuj yobc'ulalil.

¹³⁴Colin el bay yaxc'aynakil eb anima; chi yochej in c'ul chi wikej a chekbanil.

¹³⁵Chaokab a c'ul elon jun a chekbej ti', cax chin a cuyon yin a beybal.

¹³⁶Xiwilxa chin ok'i, yujtol c'am yelapnok a cuybej yul sat eb wet animail.

¹³⁷Mamin Jehová, tojol ach toni, watx'c'al yelapnok a ley.

¹³⁸Masanil tzet chala', tojol toni, xan chi je' jaon oc yin co c'ul.

¹³⁹Chi tacxac'al el in c'ul, yujtol a eb ajc'ul oc win, max toj c'ayc'ulal a k'anej yuj eb.

¹⁴⁰A alben, chi c'al yunej, tix wal yuj tu xin, xan ayin a chekbej in ti', ayc'al in camc'ulal yin.

¹⁴¹Yaynakil anima in, intaknebil in el yuj eb wet animail; palta c'am chi tojcan c'ayc'ulal a chekbanil wuj.

¹⁴²A a tojolal toc'alta' watx', axa a cuybej yel chi yala'.

¹⁴³Manxa animaok ay in c'ul, axa a chekbanil chin ak'on tzalojok.

¹⁴⁴A tzet chala', toc'alta' tojol yoqui, ak' jay in nabal, yet watx' chin iquisbic'al ec'ok.

¹⁴⁵Mamin Jehová, yin masanil in c'ul chach wawtej, tak'wej in xin, yujtol chi wochej chi wikej a beybal.

¹⁴⁶A ayach chi wal in ba; ocan wetok xin, yet watx' chi wikej tzet yetal chala'.

¹⁴⁷A yet c'amto chi k'inibi, chin aj wan in k'anon a colwal, yuj chi waoc a k'anej yipok in c'ul.

¹⁴⁸Yak'ban c'amto chi k'ekbi, chin naobtanej a k'anej.

¹⁴⁹Mamin Jehová, ab in k'anej yuj a camc'ulal; ak' in cawil, atac'ala' a tojolal.

¹⁵⁰A eb chin ukten ec'ok lanan jitzontek ba eb in c'atan, palta najat ayil eb yin a cuybej.

¹⁵¹Axa pax ach Mamin, cawil ayach ec'ok, yel ton chi yal masanil a chekbanil.

¹⁵²Payxataxc'al max wojtaknej el yuj a chekbanil, tol ach max a tz'uncan el yich a ley tu' yin tojbalk'inal.

¹⁵³Iltek in yailal Mamin, cax chin a coloni, yujtol c'am chi tojcan c'ayc'ulal a cuybej wuj.

¹⁵⁴Colin yin in yailal, cax chin eonc'al ec'ok; ak' wiquisal xin, atac'ala' yalon alben.

¹⁵⁵A eb unem yobal, c'am yalon yet eb yin a colwal, yujtol man tzakanok eb yintak a beybal.

¹⁵⁶Mamin Jehová, puch miman yayji oc a watx'c'ulal. Ak' wiquisal xin, atac'ala' a tojolal.

¹⁵⁷Xiwil eb ajc'ul oc win chin aon oc yin witz'anil, axa in xin, c'am chin elcan yin tzet yetal chala'.

¹⁵⁸A eb chi ec' yiban, c'am chi techaj eb wuj, a ton juntzan eb c'am chi iken a k'anej.

¹⁵⁹Mamin Jehová, yelc'al chin camel yin a chekbanil. Ak' wiquisal xin, yuj wal a camc'ulal.

¹⁶⁰A a k'anej caw wal yel, tojol ton masanil a ley, cax c'am bak'in chi lajwi ayok.

¹⁶¹C'am in mul cax chin yukten ec' eb anima miman yikbej, palta ay yelapnok a k'anej yul in sat.

¹⁶²Chi tzaloj in c'ul yin alben, yintak pax axca chi yuncan el c'ul mac chi yi' mimanok is tumin.

¹⁶³C'am chi cha in c'ul naoj aj k'anej, chi taccan el in c'ul yuj, palta chin camel yin a cuybej.

¹⁶⁴Yin coc'takil chi walon watx' k'anej ayach, yujtol tojol ton a ley.

¹⁶⁵A mactxel chi camc'ulnen a cuybej chi yak' eb nabal yin junc'ulal, cax c'am tzet chi ak'on ayc'ay eb.

¹⁶⁶Mamin Jehová, lanan wechbanen in a coloni, yujtol lanan wiken a chekbanil.

¹⁶⁷Lanan wiken tzet yetal chala', cax ay wal in camc'ulal yin.

¹⁶⁸Lanan wiken tzet chala', a ton a chekbanil. Ojtak masanil in beybal.

¹⁶⁹Mamin Jehová, apnokokab yel waw a satak, ak' jay in nabal axcata' yalon a k'anej.

¹⁷⁰A in txaj xin, apnokokab a satak; colin elok, atac'ala' alben.

¹⁷¹Walokab watx' k'anej en xin, yujtol ach max quin a cuy yin a beybal.

¹⁷²Ok in bitnej junok bit yuj alben, yujtol a masanil a chekbanil, tojol yayji.

¹⁷³Watx'xac'al yayji a k'ab yin yak'on colwal ayin, yujtol xiwilxac'al max wochej a chekbanil.

¹⁷⁴Mamin Jehová, yochwan wal in c'ul tol chin a colo'. Ay in tzalojc'ulal yin a cuybej.

¹⁷⁵Chi wochej tol iquis inc'al ec'ok, yet watx' ok in bitnok ayach. Ocokabc'al a tojolal wetok.

¹⁷⁶Max in c'aytok axca no calnel chi saklemtok. Sebach, sayin ec' ayin a chekbej in ti', yujtol c'am chi tojcan c'ayc'ulal a chekbanil wuj.