Read Q'anjob'al Sal 135 Bible Online

Sal 135 - Q'anjob'al bible

Sal 135

¹¡Al-layokab watx' k'anej bay Jehová! Alek watx' k'anej bay Cham a ex chekbej ex Cham ti'.

²Mac ex ayex ec' bay yamak'il is templo Jehová co Diosal,

³alek watx' k'anej bay Cham, yujtol watx' Cham. Bitnanek bay yujtol watx' is c'ul ayon anima on ti'.

⁴A conob Israel, yinatil Jacob max siq'uil Cham yet chi oc axca wal is beyomalok.

⁵Ayin ti' wojtak wal sic'libil tol a Jehová Cham Jajawil, yelxac'al tol miman yikbej yintak masanil tzet chi al-lay oc diosal.

⁶Chic'al yun Cham masanil tzet chi yochej c'ul. Chi yun bay satcan, c'al bay sat tx'otx'; chi yun bay a' mar c'al bay yich a'.

⁷Chi yitek asuntac'al bay tilakil tx'otx'; chi yitek rayo yet chi jay nab; chi jakiltek cak'ek' bay is c'uanbal.

⁸A Cham max mak'on cam is babel unin yet junjun nail eb aj Egipto, c'al babel yune' junjun no no'.

⁹A bay nan yul Egipto tu' max yatek yechelej c'ayubtak yili yin cham rey c'al yin eb is chekbej.

¹⁰Xiwil nacionlak max yak' camok; max yak' lajwok Cham eb rey tol mimek yikbej.

¹¹Max yak'on cam cham Sehón, reyalil eb amorreo, c'al cham Og, reyalil Basán, c'al masanil eb rey yul yet Canaán.

¹²Axa is tx'otx' eb rey tu' max yak' ayon conob Israel on ti' yet chi co sataknej.

¹³Mamin Jehová, a a binaji, c'am bak'in chi c'ayi. Toc'alta' ok ach nalaytek yin tojbalk'inal.

¹⁴A Jehová chi watx'nen el owal bay is conob, chi ok' is c'ul yin eb is chekbej.

¹⁵A is diosal eb tx'ok conobal, oro toni, plata toni; anima chi watx'nen juntzan tu'.

¹⁶Ay is ti', c'am chi je' k'anjabi; ay is sat, c'am pax chi je' yilwi.

¹⁷Ay is txiquin, c'am chi je' yabeni, c'am chi yi' is cak'ek'.

¹⁸Axca wal juntzan diosal tu', caywal tu' yayji eb watx'nem yechelej tu', c'al eb chi yaoc nabal yin.

¹⁹Jalek watx' k'anej bay Jehová, ex wet Israelal; alek watx' k'anej bay Jehová ex sacerdote yinatil ex Aarón.

²⁰Alek watx' k'anej bay Jehová ex yinatil Leví. Mac ex ay yelapnok Jehová yul e sat, alek watx' k'anej bay.

²¹A bay Sión al-layokab watx' k'anej bay Jehová, tol cajan Cham bay Jerusalén. ¡Al-layokab watx' k'anej bay Cham!