Read Q'anjob'al Sal 136 Bible Online

Sal 136 - Q'anjob'al bible

Sal 136

¹Al-layokab watx' k'anej bay Jehová, yujtol watx' is c'ul Cham jin, yujtol ayc'al is camc'ulal Cham yin tojbalk'inal.

²Al-layokab watx' k'anej bay Cham Diosal masanil dioslak, yujtol ayc'al is camc'ulal Cham yin tojbalk'inal.

³Al-layokab watx' k'anej bay Cham Yajawil eb yajaw, yujtol ayc'al is camc'ulal Cham yin tojbalk'inal.

⁴Asannej Cham chi unen tzet yetal c'ayubtak yoqui, yujtol ayc'al is camc'ulal Cham yin tojbalk'inal.

⁵A Cham max watx'nen satcan yuj is jelanil, yujtol ayc'al is camc'ulal Cham yin tojbalk'inal.

⁶A Cham max litx'bantok tx'otx' tx'otx' ti' yibanlak aej, yujtol ayc'al is camc'ulal Cham yin tojbalk'inal.

⁷A Cham max watx'nen c'u c'al xajaw, yujtol ayc'al is camc'ulal Cham yin tojbalk'inal.

⁸Max watx'nej c'u yet chi tzektanej c'ualil, yujtol ayc'al is camc'ulal Cham yin tojbalk'inal.

⁹Max watx'nej xajaw c'al waycan, yet chi tzektanej ak'balil, yujtol ayc'al is camc'ulal Cham yin tojbalk'inal.

¹⁰A Cham max ak'on cam is babel unin junjun na yul yet Egipto, yujtol ayc'al is camc'ulal Cham yin tojbalk'inal.

¹¹A Cham max ion eltek eb israel yul yet Egipto tu', yujtol ayc'al is camc'ulal Cham yin tojbalk'inal.

¹²Max yion eltek eb yetok is miman yipalil, yujtol ayc'al is camc'ulal Cham yin tojbalk'inal.

¹³A Cham max aon ay nan a' Cakyin Mar, yujtol ayc'al is camc'ulal Cham yin tojbalk'inal.

¹⁴Cax max yion ec'tok eb israel nan a' mar tu', yujtol ayc'al is camc'ulal Cham yin tojbalk'inal.

¹⁵A Cham max aoncantok reyal Egipto c'al is soldado yul a' mar, yujtol ayc'al is camc'ulal Cham yin tojbalk'inal.

¹⁶A Cham max ion bey is conob bay tz'inan tx'otx', yujtol ayc'al is camc'ulal Cham yin tojbalk'inal.

¹⁷A Cham max ak'on cam eb mimek rey, yujtol ayc'al is camc'ulal Cham yin tojbalk'inal.

¹⁸Max yican el k'inal eb rey mimek yikbej, yujtol ayc'al is camc'ulal Cham yin tojbalk'inal

¹⁹A ton cham Sehón, reyal eb amorreo max ilay el k'inal tu', yujtol ayc'al is camc'ulal Cham yin tojbalk'inal.

²⁰Yetok c'apax cham Og reyalil Basán max ilay el is k'inal, yujtol ayc'al is camc'ulal Cham yin tojbalk'inal.

²¹Max pojlaytok is tx'otx' eb rey tu', yujtol ayc'al is camc'ulal Cham yin tojbalk'inal.

²²Cax max yak'on Cham jun tx'otx' tu' is satakok Israel is chekbej, yujtol ayc'al is camc'ulal Cham yin tojbalk'inal.

²³A Cham max on naontek yet cannak on yalan, yujtol ayc'al is camc'ulal Cham yin tojbalk'inal.

²⁴Cax max on colc'al yul k'ab eb ajc'ul oc jin, yujtol ayc'al is camc'ulal Cham yin tojbalk'inal.

²⁵A Cham chi ak'on low anima c'al no no', yujtol ayc'al is camc'ulal Cham yin tojbalk'inal.

²⁶¡Al-layokab watx' k'anej bay Cham Diosal satcan, yujtol ayc'al is camc'ulal Cham yin tojbalk'inal!