Read Q'anjob'al Sal 139 Bible Online

Sal 139 - Q'anjob'al bible

Sal 139

¹A ton bit David ti' Mamin Jehová, ojtak in sic'libil, cax max ak' bey a c'ul win.

²Tz'akanc'al ojtaknen el masanil tzet chi wunej; yin ayoktoc'al cax chojtaknen el tzet ok in na'.

³Ojtakxa bay chin ec'jabi, c'al bay chin xewi; cax ojtak masanil tzet chi el wuneni.

⁴Toltax c'amto chin na' tzet ok wala', axa pax ach Mamin, ojtakxa.

⁵Oyan ach oc masanil winlak, cax ayajtok a k'ab wiban.

⁶C'ayubtakxac'al yoc a jelanil ti'; caw c'am chi nachaj el wuj; miman yelapnok, cax chi c'ayaj in c'ul yuj.

⁷¿Baytowal ok ca welaj bay Espíritu? ¿Baytowal ok ca welaj a satak?

⁸Ta chin toj satcan tu', a tu' ayach ec'ok; ta chin aycantok yulak c'ul tx'otx' tx'otx', ayach c'apax ach ec' bay tu'.

⁹Ta chin toj sataktok bay chi ajol c'u, ma chin toj cajay bay a' mar bay yayob c'u,

¹⁰palta chic'al apni oc a k'ab win bay tu'. Majton in beklay el yuj a watx' k'ab.

¹¹Ta chin na' in c'uban el in ba bay k'ekk'inal, ta chin k'an q'uexpoj oc c'ualil yin ak'balil bay ayin ec' ti',

¹²a jun ak'balil tu', maj je' in is c'uban el a satak; a k'ekk'inal, lajan yetok sakk'inal a satak. C'am q'uexanil ak'balil yul a sat, yujtol sakk'inalc'al el masanil.

¹³Ach ton wal max a watx'nej masanil yetbeyom in mimanil. Ach max in a watx'nej yin in txutx.

¹⁴Chi wal watx' k'anej ayach, yujtol ayin oc yin ijinakc'ulal, yujtol c'ayubtakxac'al tzet chonej. Chixa nachaj el jun ti' wuj sic'libil.

¹⁵A yet max yion yip ch'ib in mimanil, man ebebilok el yul a sat, mawal yet max in watx'ji el yin man txequelok yin in txutx.

¹⁶Max yil a sat in mimanil yet c'amto chin alji. Masanil bisil c'ual in k'inal, tz'ib yayji yul a libro yet c'amto junok c'ual chi wila'.

¹⁷Ach in Diosal, c'am chi nachaj el a nabal wuj; c'am lajubal bisil.

¹⁸Ta chin oc ijan in bisoni, ec'ban bisil yintak ch'en arena. A yet ok el in wayan, ayinc'al ec' a satak.

¹⁹Ach in Diosal, ican el is k'inal eb unem yobtakil, cax najat checan el eb mak'om cam anima in c'atan.

²⁰Yujtol yob tzet chi yal eb ajc'ul en, chach yak' binaj eb yin yobal.

²¹Mamin Jehová, chin cak eb chach cakoni, cax c'am chi wochej eb ajc'ul oc en.

²²C'am chi wochej eb yin junelnej, yujtol ajc'ul eb win waloni.

²³Ach in Diosal, ak' bey a c'ul yin wanimail, il c'apax oc in nabal.

²⁴Ila', tatol lanan in toj yin yob beybalej, cax chin ekbantok yul beal k'inalej tol ayc'al yin tojbalk'inal.