Read Q'anjob'al Sal 140 Bible Online

Sal 140 - Q'anjob'al bible

Sal 140

¹A ton bit David ti' Mamin Jehová, colin el yul k'ab eb unem yobal, c'ubaj in el yul sat eb yaxc'ayinak c'ul,

²c'al yul k'ab eb chi nac'al yobtakil; asan owal chi na eb masanil tiempo.

³A is ti' eb, axca wal ti' no labaj, axa is k'anej eb axca wal venenoal no txutx labaj.

⁴Mamin Jehová, c'ubaj in el yul sat eb unem yobal yin yaxc'ayinakc'ulal, mawal eb chi naon tzet utbil chi yun wayc'ayi.

⁵A juntzan eb lues anima tu', max yaay eb yal yul in be, max yaay eb tx'an yal.

⁶A bay Jehová max wala': In Diosal ach. Abintek xin, yet chi el waw walon in ba.

⁷Mamin Jehová Wajawil, in Colomal tol chic'al je' oj, ach ton chin a col xol owal, quin chi.

⁸Mamin Jehová, man ak' yochwan eb unem yobal, man ak' yun is nabal eb nabalnebil yuj tu', yet watx' c'am chi maynej ba eb. Ayc'ayokab yiban eb chi oymoj oc win, tzet yetal max na eb tu'.

¹⁰Ayc'ayokab tzak'ak' tol cakxayinak yiban eb, cax k'oklayokabtok eb xol k'ak'ej. Tokokab eb yulak xab olan, bay c'amxa chi je' yajtek eb.

¹¹Manokab ayjok ec' mac alom yobal k'anej sat tx'otx' ti'; tzaklojokab yobtakil yintak eb yaxc'ayinak c'ul, cax chi c'ayil eb.

¹²Wojtak ayin ti' tol ach cha watx'nej el is k'anej eb meba', cax chi colon el is satak eb ayoc yin bilc'ulal.

¹³A eb anima watx' nabal, ok yal eb watx' k'anej en. A eb anima tojol beybal, ok ayjok eb a satak.