Read Q'anjob'al Sal 143 Bible Online

Sal 143 - Q'anjob'al bible

Sal 143

¹A ton bit David ti' Abintek yin in txaj, Mamin Jehová; chi cam wal aben tzet chi wal xin. Tak'wej in; ilabi tol watx' ach toni, cax chak'onc'al yun tzet chala'.

²Man a k'anlej tzet wayji oc ayin a chekbej in ti', yujtol c'am mactxel watx' yayji a satak.

³Max in uktelay yuj eb ajc'ul oc win, cax max in tec'lay ay yuj eb sat tx'otx'. Max in yak' cajay eb xol k'ekk'inal, axca wal yayji eb camnakxa.

⁴Manxa animaok ay in c'ul tinani', sombinak ay in c'ul.

⁵Chin natek yet yalantok, cax chi c'oli in naontek masanil tzet max onej.

⁶A wal ayach chin mojbaj in k'ab; xiwil chach wochej axca yochen takin tx'otx' aej.

⁷Ach Jehová, tak'wej in yin ayman. Toxa chi el in c'ul chi wabej. Man a basnej a colwal ayin; axca mi eb camnak chi wuncan elok, tatol cha basnej a colwal ayin.

⁸Ak' in natek a camc'ulal yet junjun k'inibalil; ilab tol ach chach waoc yipok in c'ul. Tx'ox ayin, tzetbil ok yun in beytok, yujtol ipan in txajli ayach.

⁹Mamin Jehová, colin el bay eb ajc'ul oc win, yujtol a en chin say in colbanil.

¹⁰Cuyinc'al wunen ochwan, yujtol in Diosal ach. Aokab a watx' Espíritu, chin ion bey yin a watx' beybal.

¹¹Mamin, manchak in a cha' camok, yet watx' c'am chi al-lay yob k'anej en. Yujtol watx' ach toni, i in eltek yin in bilc'ulal.

¹²Yuj a camc'ulal win, xan cha c'aycan el masanil eb ajc'ul oc win, yujtol a chekbej in xin.