Read Q'anjob'al Sal 144 Bible Online

Sal 144 - Q'anjob'al bible

Sal 144

¹A ton bit David ti' ¡Al-layokab watx' k'anej bay Jehová Cham Wipomal! A ton wal Cham chin k'aytzeni, cax chin cuychaj el yuj, yet watx' chi je' wak'on owal.

²A ton Cham axca in nach'en, axca tol in cuartel, c'al in Colomal. A yin Cham ebebil in elok. A Cham ayoc wenelok. A chi aon oc conoblak yalan wikbej.

³Mamin Jehová, ¿tzet jelapnok ayon anima on ti' yul a sat, xan chon a natek, cax xiwil chi ec' nanon a c'ul yuj co watx'ilok?

⁴Ayon anima on ti', lajanc'al axca ibal cak'ek'; axa co k'inal, axcac'al junok enelej chi eq'uelok.

⁵Mamin, jak puertail satcan cax chach ayolok; chach ayol chonlak witz, cax chi aj mubal.

⁶Jul junok a julbal, a ton a rayolak, cax chak'on elaj eb ajc'ul oc en yin somc'ulal.

⁷Ata bay satcan tu' cha jabaj el a k'ab, cax chin a colon el bay jun a' mar caw wal miman, chi yal elapnok tol a ton eb tx'ok animail.

⁸Colin el bay eb lek'ti' tu', eb chi yak' is ti' yin tzet yetal man yelok.

⁹Ach Dios, ok in bitnej jun in ac' bit ayach; ok wak' juntzan in bit yin sonal salterio ayach.

¹⁰Oj wali xan chi je' yuj eb rey, ach ton max in a col bay ch'en espada c'aywajwom, ayin David a chekbej in ti'.

¹¹A tinani' xin, colin el bay yipalil eb tx'ok animail, eb lek'ti' chi yak' is ti' yin tzet yetal man yelok.

¹²Ch'ibokab eb co c'ajol on, axca awoj tol ya' ilbil. A eb co cutz'in on, yunokab eb ix axcawal oy yipomal templo tol watx' yili.

¹³A co c'unalak nojnakokab el yuj masanil pojanil loj. A co calnel on, ajokab can bisil no' yin milal, yinokab xiwilxa milal bisil no' baytak chi ec' no' lowok.

¹⁴A co wacax on, uniwokokab no'; manokab toc'alok chi el yune' no' yin. C'amokab mactxel chi el yaw yulak co calle on yuj yailal.

¹⁵Yelxac'al watx' yet jun conob tol axca tu' yayji. Yelxac'al tol watx' yet jun conob tol a Jehová ayoc is Diosalok.