Read Q'anjob'al Sal 146 Bible Online

Sal 146 - Q'anjob'al bible

Sal 146

¹¡Al-layokab watx' k'anej bay Jehová! Yin masanil in c'ul ok wal watx' k'anej bay Cham.

²Yak'ban iquis into ok wal watx' k'anej bay Cham. Yak'ban ayinto ec'ok, ok in bitnok bay in Diosal.

³Manchak e yaoc anima miman yelapnok yipok e c'ul, yujtol naba animac'al eb, xan c'am chi je' colwaj eb.

⁴A yet chi cam eb, chi occan eb pokokal; a yet jun c'ual tu' chi tancan el tzet yetal chi na eb watx'neni.

⁵Tzalojc'ulal yet mac chi cha' colwal bay is Diosal Jacob, a ton eb chi yaoc Jehová yipok c'ul.

⁶A Cham max watx'nej satcan, tx'otx' tx'otx' c'al a' mar, yetok masanil tzet yetal ay bay junjun makan tu'. Chic'al yun tzet chi yal Cham.

⁷Chi watx'nej yayji is yailal eb chi etaxi, cax chi yak'on loj bay eb ay is wajil. A Cham chi colon el eb ayoc preso.

⁸A Jehová chi jakon sat eb c'am chi je' ilwi, cax chi yion aj wan eb telc'ojnaktok. Chi camc'ulnej Cham eb anima watx' is nabal.

⁹A Jehová chi colon el eb anima tx'ok is conob. A c'apax Cham chi ilon eb unin c'amxa is mam, c'amxa is txutx, c'al eb xal ix camnakxa yichamil. Axa eb unem yobtakil xin, chi yetnejtok is be eb.

¹⁰Ex aj Sión, a Jehová ok yak' yajawilal yin tojbalk'inal. A co Diosal ok oc Reyalok yin tojbalk'inal. ¡Al-layokab watx' k'anej bay Jehová!