Read Q'anjob'al Sal 147 Bible Online

Sal 147 - Q'anjob'al bible

Sal 147

¹¡Al-layokab watx' k'anej bay Jehová! Manxa watx'ilok co bitnen bit bay Cham co Diosal. Yujtol watx' ton c'ul Cham, moj chi bitnelayi.

²Chi ca watx'nelay Jerusalén yuj Jehová, cax chi wajban oc eb jet Israelal sakleminak yayji.

³A eb manxa animaok ay c'ul, a Cham chi mimanc'ulnen eb yin is yatakilal.

⁴A Cham chi bison jantak waycan, cax chi yaon oc is bi junjun.

⁵Yelxac'al ton miman yayji co Diosal ti', miman is yipalil, cax c'am lajubal is jelanil.

⁶A Cham chi ion aj wan eb anima yaynakil, palta a eb unem yobtakil, chi ilay ay eb sic'libil.

⁷Bitnokonek bay Jehová yin aloj yuj diosalil, yin sonal arpa co bitnej co Diosal.

⁸A Cham chi ak'on noj satcan yuj asun, cax chi yak'on nab yiban tx'otx' tx'otx'. A Cham chi ak'on ch'ib an ac'un bay tzalanlak.

⁹A c'apax Cham chi ak'on low no no', c'al no yune' joj yet chi el yaw no' yuj wajil.

¹⁰C'am chi tzaloj c'ul Cham yuj yipalil no chej, tamwal yuj yipalil yakan junok anima;

¹¹palta chi tzaloj Cham yetok eb ay yelapnok Cham yul sat, a ton eb chi yaoc is camc'ulal Cham yipok is c'ul.

¹²Ex aj Jerusalén, alek watx' k'anej bay Jehová, ex aj Sión bitnejek co Diosal.

¹³A Cham chi aon oc yip yijul puertalak, cax chi yak'on is watx'c'ulalil bay juninal.

¹⁴A Cham chi ak'on junc'ulal bay co makbej, cax chi yak'on noj co c'ul yuj trigo watx'.

¹⁵Chi yal Cham is k'anej bay tx'otx' tx'otx', cax yin ayman chi yunej.

¹⁶A yuj Cham xan chi makay el sat tx'otx' yuj sakbacom, cax axca wal sak lana yili, cax chi saklemnej ch'en chew, axca tik'ak'il tan.

¹⁷A Cham chi aontek sakbat axca ch'en ch'en, axa is sical ch'en, c'am mac chi techaj yuj.

¹⁸Chi yalon pax Cham, cax chi uljipaxtok ch'en chew. Chi jay cak'ek', axa beytoj a' aej tu'.

¹⁹Max yak' Cham jojtaknej el is k'anej, c'al is ley ayon Israel on ti', is yinatil on Jacob.

²⁰Man cayok tu' max yut Cham juntzanxa nacionlak; c'amc'al bay max yojtaknej el eb is k'anej Cham. ¡Al-layokab watx' k'anej bay Jehová!