Read Q'anjob'al Sal 148 Bible Online

Sal 148 - Q'anjob'al bible

Sal 148

¹¡Al-layokab watx' k'anej bay Jehová! ¡Al-layokab watx' k'anej bay Cham tac'al bay canil satcan!

²Alek watx' k'anej, masanil ex yángel Cham. Alek watx' k'anej, masanil ex soldadoal satcan.

³Ilayokab can Jehová yuj c'u, c'al yuj xajaw. Ilayokab can Cham yuj puj watx' yak'on is k'ak'al.

⁴Ilayokab can Cham yuj satcan, tol cantac'al ay, c'apax yuj a' aej ay ajtok yiban satcan.

⁵¡Al-layokab watx' k'anej bay Jehová, yujtol a Cham max aloni, cax max esnelay aj masanil!

⁶A Cham max watx'nen oc masanil juntzan tu' bay ayic'ok yet watx' ayc'al yin tojbalk'inal, cax max yaon oc leyalil tol c'am bak'in chi q'uexlayi.

⁷Yalokab watx' k'anej bay Jehová masanil tzet yetal ay sat tx'otx', no mimek no' ay yul a' mar, c'al no' bay najatil yich a',

⁸yetok rayo, sakbat, sakbacom, ak'bal asun, cakxuchum tol yikem bay k'anej Cham.

⁹Yalokab watx' k'anej bay Jehová mimek witz, tzalanlak, yetok te satnomtelak, c'al te c'ute',

¹⁰yetok no xolakteal no', c'al no jobbejal no', no' chi jutxtok ba, c'al no tz'iquin.

¹¹Alek watx' k'anej ex reyalil yulyibank'inal ti', c'al ex conoblak, c'al e masanil ex yajaw, c'al ex juezal conob,

¹²ex winak, c'al ex ix, ex icham anima, c'al ex unin.

¹³Alek watx' k'anej bay Jehová e masanil, yujtol asan Cham yelxac'al mimanbil. A is yikbej, ayajtok tac'al yibantok satcan, c'al yiban tx'otx' tx'otx' ti'.

¹⁴A Cham max ak'on jun co Reyal miman yipalil. ¡Jalokab watx' k'anej bay Cham, ayon Israel on is conob on ti', tol ayon ec' is cawilal! ¡Al-layokab watx' k'anej bay Jehová!