Read Q'anjob'al Sal 18 Bible Online

Sal 18 - Q'anjob'al bible

Sal 18

¹A jun is bit David chekbej Jehová ti', max bitnej bay Cham, yet max col-lay el yul k'ab eb ajc'ul, c'al yul k'ab cham rey Saúl. Mamin Jehová, chach in camc'ulnej, Wipomal ach.

²Ach Jehová, axca tol in nach'en ach, axca tol in cuartel ach, in Colomal. Ach in Diosal, in mayk'ak'al ach, a en chin col in ba, in taynemal ach, in Colomal ach tol ay epalil; oj xan c'am chin michchaj yuj eb ajc'ul.

³Ok wal in ba ayach, tol a moj wal a bitnelayi, catawal tu' ok in colchaj yul k'ab eb ajc'ul.

⁴A is may camich max oymoj oc win. Max jay xiwc'ulal win satak eb c'aywajwom xiwil yip.

⁵A camich axca tol mayal c'aloc lasu win. A yolanil camich axca tol max watx'nej in yalil.

⁶Max wal in ba bay Jehová yet ayin tok xol in somc'ulal. Max in k'an colwal bay in Diosal. A bay is templo Cham max quin yabej. Max apni waw bay is txiquin Cham.

⁷Catatu' max ec' jun miman quixcab puch ow. Yelc'ulal max bil xelak mimek witz. Max cam tziclay yuj yowal Cham.

⁸Max eltek mub yul is txam, axa yul is ti' max eltek k'ak'ej tol c'aywajwom. Max eltek jul-lajbok tzak'ak' yul is ti'.

⁹Max eltek jucnaj Cham bay satcan, cax max ayolok. Mimek k'ek asun ayoc yalan yakan.

¹⁰Ayaj yiban jun querubín, cax max toj jupupok; max toj batxatxok yiban cak'ek'.

¹¹Axca tol c'uan el bay tu', bay xiwil k'ekk'olinakil. Max c'ubaj el ba xol k'ek asun tol nojnak el yuj aej.

¹²Ay rayo chi eltek joblabok satak Cham, max tit sakbat xol asun yetok tzak'ak'.

¹³A Jehová, Cham Axac'al Ocok, max el yaw, axca wal bil c'u bay satcanlak. Max tit sakbat c'al tzak'ak'.

¹⁴Max yatok is julbal, axa eb ajc'ul max uchchajtok eb. Max yatok is rayo, max uktelay el eb yuj.

¹⁵A yich a' mar max txecloji. Axa xeal yulyibank'inal ti' max jakayi, cax max txecloji yuj can yul is nuk' Jehová, tol ay is may, yuj c'apax jun cak'ek' puch ow max yatek.

¹⁶Max batxbajtek Dios is k'ab ayin tac'al bay satcan tu', cax max in yiontek Cham bay a' najab najat yich.

¹⁷Max in is colcan el Cham bay eb ajc'ul xiwil yip, tol c'am chin is yochej eb, cax yelxac'al tec'an waay eb wintak.

¹⁸Max oc bulnaj eb win yet ayin oc yin ok'balc'ulal, palta axa Cham Jehová max oc wetok.

¹⁹Max in yican eltek Cham cax max in yaoncan bay colan. Max in is col Cham, yujtol chin is camc'ulnej.

²⁰A Jehová max yak' in paktzil, atac'ala' in tojolal. Max yak' watx'c'ulal ayin, yujtol c'am in mul,

²¹yujtol max wikej is beybal Cham, cax yel wal maj wak' yobc'ulal wion el in ba bay in Diosal.

²²A in satak ayic' masanil is cuybej Cham, cax c'amc'al chin el bay is k'anej.

²³Watx'c'al in beybal satak Cham. Max in taynej in ba yet c'am chin ayc'ay yin yobtakil.

²⁴Tix wal yuj tu' xan max yak' Jehová paktzil ayin atac'ala' in tojolal, yujtol c'am in mul yul sat Cham.

²⁵Mamin, a mac ikem ayach, chi yunc'al a k'anej bay. Axa mac watx' yochwan, watx' c'apax ochwan bay.

²⁶Watx' a beybal bay mac watx' is beybal, palta cha tx'ox a jelanil yin a tenon ec' nabal eb etnem anima,

²⁷yujtol ach cha col eb ayilwom, cax cheon ay eb lues.

²⁸Mamin Jehová, ach ton ok ak' sakk'inal ayin. Ach in Diosal, ach ok ecan el k'ekk'inal win.

²⁹A yetok a colwal max wuchcantok eb soldado, cax max in ec'can el yiban murallail conob.

³⁰Yelxac'al watx' beybal Jehová Dios. A yalben Cham, moj wal tol c'am co cabc'ulal yin. Chi colcan el Cham masanil mactxel yipc'ulej yayji Cham yuj.

³¹Tokwal ay junokxa Dios yintak Jehová. Tokwal ay junokxa colwajwom yintak co Diosal.

³²A Dios chi ak'on c'al wip. A Cham chi watx'nen in be.

³³Axca bey txutx tx'ucchej, caytu' chi yun in bey yuj Cham. Tec'an in waay yuj, bay yelxac'al satlak witz yeq'ui.

³⁴A Cham chin k'aytzen yin owal cax chi yak'on wip yin in pakon julbalej tol bronce.

³⁵Ach Mamin chin a c'ubaj, cax chin a coloni. A yipal a watx' k'ab max in mitx'on waayok. A wal watx'il a c'ul max quin ion aj can.

³⁶Max quin aoc yul jun be lean yet watx' c'am chin aj jabnajok.

³⁷Max wuktej ec' eb ajc'ul oc win, max ton michchaj eb wuj, cax maj in oc wanajok, masantac'al max cam eb wuj.

³⁸Coc'xac'al max wutcantok eb yet watx' manchakxa aj wan eb. A xol wakan max ayc'ay eb.

³⁹Ach ton max ak' wip yet max in ak'wi owal. A eb max caktzaj oc win, max acan oc eb yul in k'ab.

⁴⁰Ach max a chekcan el eb ajc'ul oc win in satak. Yuj tu' xan max je' wuj in c'ayon el eb c'am chin ocheni.

⁴¹Max k'an eb colwal, palta c'am mactxel max colon el eb. Max yal ba eb bay Jehová, palta maj tak'wok Cham bay eb.

⁴²Max coc'axtok eb wuj, axca wal pokok chi ilaytok yuj cak'ek'. Max in tec'can ay eb, axca wal tec'lay ay tz'otz'ew yulak be.

⁴³Max quin a colcan el bay yowal eb conob, max in acan oc yajawilok mimek conoblak. A eb anima man wojtakok, a eb chin ak'on serbil.

⁴⁴Asanc'al yaben eb wabixal, ikem eb ayin. A eb tx'ok conobal, chi yaoc ba eb yul in k'ab.

⁴⁵Chi xiwcan aj eb cax chi bilaj eb. Chi eltek eb yul is cuartel.

⁴⁶Iquis ec' Jehová. ¡Al-layokab watx' k'anej bay in Colomal! ¡Ilayokab can Dios, Cham in Colomal yayji!

⁴⁷Chi paktzej Cham bay eb chin etneni, cax chi yiontek eb conoblak yalan wikbej.

⁴⁸A Cham chin colon el bay yowal c'ul eb ajc'ul oc win, eb max caktzaj oc win. Mamin, ach ton chin a col bay nak yaxc'ayinak c'ul win.

⁴⁹Yuj wal tu xin, chi wal watx' k'anej en xol mimek conob, xan chach in bitnej.

⁵⁰Oj wali, xan chi ayc'ay mimek owal wuj, ayin rey in, sic'bil in oj ti'. Yinc'al camc'ulalil chach beytok wetok ayin David in ti', c'al yetok winatil yin tojbalk'inal.