Read Q'anjob'al Sal 20 Bible Online

Sal 20 - Q'anjob'al bible

Sal 20

¹A ton bit David ti' Mamin rey, yabokab Cham Jehová a txajli yet ayach oc yin a bilc'ulal. Aokab Cham Diosal Jacob chach coloni.

²Yaokabtek is colwal ayach tac'al bay templo bay Sión.

³Naokabtek masanil a ofrenda. Chaokab c'ul Cham a xajanbal chak' tz'aok.

⁴Yak'okab yun Cham yochwan a c'ul, cax chi yak'on yun Cham masanil tzet yetal nabalnebil oj.

⁵Ok el jaw yuj tzalojc'ulal yet ok ayc'ay eb ajc'ul oj, cax ok jion aj banderalak yuj jion can co Diosal. ¡Yak'okab Cham masanil a k'anben!

⁶Jojtakxa tinani' tol chi col Jehová co reyal sic'bil el yuj. Atac'al bay satcan tol asan Cham ay yet, ok tak'woktek bay. Yuj yipalil is watx' k'ab Cham, xan ok ayc'ay mimek owal yuj.

⁷A jaywan eb, a is carruajelak yet owal chi yaoc yipok c'ul, axa juntzanxa eb, a is chej eb chi yaoc yipok c'ul; axa on ayon ti', a Cham Jehová co Diosal chi jaoc yipok co c'ul.

⁸A eb tu', chic'al pax yip yakan eb, cax chi ayc'ay eb; axa pax ayon ti', tec'anc'al co waayi, cax lecan onc'al ajok.

⁹¡Mamin Jehová, col cham rey! ¡Tak'wej on yet chach jawteni!