Read Q'anjob'al Sal 21 Bible Online

Sal 21 - Q'anjob'al bible

Sal 21

¹A ton bit David ti' Mamin Jehová, a cham rey chi tzaloj yuj chi je oj masanil. Yelc'al tol chi tzaloj c'ul cham, yujtol oj wali max je yuj.

²Max ak' yun is yochwan c'ul cham; maj wal a ten tzet chi k'ana'.

³Max ak' xiwil watx'ilal bay, cax max aon ajtok jun corona oro yin is jolom.

⁴A k'inalej tol ayc'al yin tojbalk'inal max k'an ayach, max ak' bay.

⁵Caw mimanbil cham yuj a colwal. Oj wali, xan caw wal chi je' yuj, ay c'apax is mayk'ak'al.

⁶Xiwil a watx'c'ulalil max ak' bay yin tojbalk'inal; a a satak chi tzaloj aj c'ul.

⁷Yujtol a a camc'ulal Mamin Jehová, ach tol Axac'al ach Ocok, a' ayoc yipok c'ul cham rey, xan c'am bak'in ok ayc'ayok.

⁸Mamin rey, ok a mitx' masanil eb ajc'ul oc en, cax ok a mitx'on eb c'am chach ocheni.

⁹A yet ok a tx'oxon a ba xol eb, cax ok a c'ayoncan el eb, axca chi yun junok tzet yetal yuj k'ak' k'ak'ej. A Jehová ok c'ayoncan el eb yetok yowal c'ul, axa k'ak' k'ak'ej ok ak'onxac'al lajwok eb.

¹⁰A yuninal eb ajc'ul ok a c'aycan el sat tx'otx', axa yinatil eb ok a c'aycan el xol anima.

¹¹Caxc'al chi yochej c'ul eb chach yetnej, cax nanon yec' c'ul eb en yin tzetbil chi yun ayc'ayi, palta maj je' yuj eb.

¹²A ti et, tol ok tokcan eb elaj oj, yet ok oc ijan a julbal yin eb.

¹³Mamin Jehová, ilayokab ach can yujtol chi je' oj masanil. Ok co bitnej epalil.