Read Q'anjob'al Sal 22 Bible Online

Sal 22 - Q'anjob'al bible

Sal 22

¹A ton bit David ti' Ach in Diosal, ach in Diosal, ¿tzet wal yuj xan chin a bekcanok? ¿Tzet wal yuj xan c'am chin a colo', yet chi el waw xol in yailal?

²Ach in Diosal, chach wawtej yet c'ualil, palta c'am chin a tak'wej; chach wawtej c'apax yet ak'balil, palta c'amc'al xewilal wet.

³Axa pax ach xin, yel Asanxanej Ach Ocok, chach bitnej eb wet israelal.

⁴A eb jichmam on, max ach yaoc eb yipok c'ul, yuj tu' max a colcan el eb.

⁵Max yal ba eb ayach, xan max a colcan el eb. Ay ach oc yipok c'ul eb, xan maj el q'uixwil eb.

⁶Axa in xin, man animaok in chi wabej, axca wal junok no patz in ayin ti'. Tzeyejtak wayji yuj eb wet animail, cax intaknebil in can elok.

⁷A eb chin iloni, buchbejal wayji yuj eb; chin yetz'ej eb, chi yak'on bil eb jolom,

⁸cax chi yalon eb: A jun ti', a Jehová max yaoc yipok c'ul, yuj tu xin, col-layokab el yuj Cham. Bekchajokab el yuj Cham, ta ochebil yuj, ẍi eb.

⁹Yel toni, ach max quin ak' aljok; a bay txam c'ul in txutx max quin ak' xewok.

¹⁰Yettax max quin alji, max quin occan yul a k'ab, ataxc'al yet ayinto oc yin in txutx, in Diosal achxac'alta'a.

¹¹Yuj tu xin, man a besil a ba ayin; ayin oc yin mimek yailal, c'am pax mac chi oc wetok.

¹²Mayal wal oymoj eb ajc'ul oc win, axca wal owal wacax bay yul yet tx'otx' Basán, cay wal tu' eb.

¹³Chi jorrori yul nuk' eb axca wal no coj; chi jak eb is ti', cax chi jay eb win.

¹⁴Max elcan wip, axca wal chi yun pultok a' aej; mayal beklej ba in bakil; a wal wanimail, mayal uljitok yul in c'ul axca wal ixcab.

¹⁵Mayal takcan el yul in nuk' axca wal takin tx'otx'; mayal cancan lac'an wak' yin in jom; max quin acan aytok xol pokok axca junok camnak.

¹⁶Jun wal bulan eb yobtakwom max oc bulan win axca wal tx'i'; max yol eb in k'ab c'al wakan.

¹⁷Chi je' chin bis masanil in bakil. T'ananc'al oc eb ajc'ul win.

¹⁸A in pichil max pojcan ec' eb yin, a yin in jokan pichil max yak' eb suerte.

¹⁹Axa ach Mamin Jehová, Wipomal ayji ocok. Manchak ach toj najat. Colwajan, titan yin aymanil ayin.

²⁰Colin, manchak in a cha xiklay camok. Manchak in a bek cam yuj eb axca tx'i' tu'.

²¹Colin el bay ti' juntzan axca coj tu', colin el bay yuc'a' juntzan axca c'ultakil wacax tu'.

²²Ok walcan el abixal bay eb wet conob; a yet ok wajon ba eb, ok ach in bitnej xol eb.

²³Alek watx' k'anej yin Jehová, mac ex ay yelapnok Cham yul e sat. ¡Mimanbilnejek Cham, masanil ex yinatil Jacob; masanil ex yinatil Israel, ak'ek ayilal bay!

²⁴Yujtol maj yintaknej el Cham is yailal mac ayoc yin bilc'ulal; man toc'alok max yil ocok; maj c'ubaj el ba Cham bay. A yet max k'anon is colwal Cham, max yikej Cham yabeni.

²⁵Ok ach in bitnej satak jun miman wajayil a conob, c'al satak eb chach xajaneni, ok wak' yun walben ayach.

²⁶Ok low eb meba', cax ok nojcan c'ul eb. A eb chi oc ayilal bay Jehová ok yal eb watx' k'anej bay; iquisokab ec' yanimail eb yin tojbalk'inal.

²⁷Masanil nacionlak, c'al inatilej cajan bay lajub tx'otx' tx'otx' ok nalaytek Jehová yuj. Ok jay eb bay Cham, cax ok ay jajan eb satak.

²⁸Yujtol a Jehová ay yet masanil ikbejlak, tol a Cham ayoc Yajawilok masanil nacionlak bay yulyibank'inal.

²⁹Masanil eb beyom ok low eb, cax ok yak'on eb ayilal bay Jehová. Masanil eb cajan xol pokok, ok ay jajan eb satak Cham. C'am mactxel chi je' colon ba bay camich.

³⁰A eb itxiquinej yet bak'in, ok yiay ba eb bay Cham. Ok al-lay yabixal Cham Yajaw bay eb anima ok jay yet yajtok tu'.

³¹A eb ok aljok yet yajtok tu', ok al-lay yabixal is tojolal Cham, c'al is yunben Cham bay eb.