Read Q'anjob'al Sal 27 Bible Online

Sal 27 - Q'anjob'al bible

Sal 27

¹A Jehová chin tzektaneni, a' c'apax in Colomal. ¿Macto wal bay ok in xiwok? A Cham chin coloni, xan c'am bay ok in xiwok.

²A eb yobtakwom chi waj ba eb win yet chin is c'ayon el eb yaloni, palta a eb ajc'ul win tu', ok ayc'ay eb.

³Caxc'al jun bulan soldado chi oymoj oc win, wal yel man ok xiw in c'ul bian. Caxc'al chi aj wan eb yin owal win, ac'ala' waon oc Dios yipok in c'ul.

⁴Junnej wal tzet yetal max in k'an bay Jehová, a ton jun tu' ok in saya', cax tix ti': Tol chin ayji bay is templo Cham yet iquis in, yet watx' ok je' wuj wak'on ayilal bay Cham yul templo tu', cax ok cam in c'ul wilon yin is watx'il yili.

⁵A yet ok jay yailal wiban, a Cham ok in c'uban elok. A bay is templo ok in is c'ubaj elok. Ok in yajtok Cham chon ch'en bay chin colchaji.

⁶Tix wal ok yun in colchaj el bay eb ajc'ul oyan oc win tu'. Yin aw yet tzalojc'ulalil ok wak' in xajanbal bay Jehová yul is templo. Ok wal watx' k'anej yin bitalil bay Cham.

⁷Mamin, a ayach chi aj waw, abintek xin. Ok'wal a c'ul win, tak'wej in.

⁸Mamin Jehová, ach max al ayin: Jitztek a ba in c'atan, cachi. Chi wochej chin oc a c'atan, ẍi in nabal.

⁹Man a c'ubaj el a ba ayin. Manchak in ak' meltzoj yin owal. Achc'alta' chin a colo'. Manchak in a bekcan in tx'oklil, tol in Diosal ach, in Colomal ach.

¹⁰Mamin Jehová, ach ok el tzet ok wunej, caxc'al mi chin beklaycan yuj in mam c'al yuj in txutx.

¹¹Tx'ox a be ayin Mamin; iintok yul be tol jichan, mul yailok eb ajc'ul oc win.

¹²Manchak in acan oc bay yochwan eb ajc'ul oc win. Lek'ti' testigo eb; chi yochej eb chin yak' camok.

¹³Xam wal pax wip, ta maj waoc yin in c'ul is watx'c'ulal Cham Jehová ayin, yak'ban iquis into ec'ok.

¹⁴¡Ac'al oc Jehová yipok a c'ul! ¡Tec'an chot waay a ba, manchak cabax aj a c'ul! ¡Yel wali, ac'al oc Cham yipok a c'ul!