Read Q'anjob'al Sal 29 Bible Online

Sal 29 - Q'anjob'al bible

Sal 29

¹Ex aj satcan, alek watx' k'anej bay Jehová; alek watx' k'anej yin, yujtol chi je' yuj masanil, c'al yuj is mimanbilal.

²Alek watx' k'anej bay Cham yujtol is moj wali. Ak'ek ayilal bay Cham yul makbej yet ayilal.

³Chi ablay yul nuk' Jehová yiban a' mar. A Dios mimanbil chi ak'on bil yiban a' marlak.

⁴A yul nuk' Jehová chi ablay yin xiwil yipalil, cax caw chi c'ayaj co c'ul yuj.

⁵Chi coc'axtok te c'ute' yuj is yaw Cham. Yuj Cham xan chi pojtok te c'utelak bay Líbano.

⁶A juntzan witzlak yet Líbano, c'al yet Sirión chi yak' bilok; chi yiaj t'uklabok axca no ach'ej wacax.

⁷A yaw Cham Jehová chi aontek rayo.

⁸A yaw Cham Jehová chi ak'on bil tz'inan tx'otx'lak, a chi ak'on bil tz'inan tx'otx' yet Cades.

⁹A yaw Cham Jehová chi ion el is k'ablakil te' ji, cax asanxanej is k'ojal te' chi cancan xolak witz. Axa bay is templo Cham chi al-lay watx' k'anej bay.

¹⁰A Jehová max yajawbi yin jun owal aej mukwajwom. Yajaw yayji Cham yin tojbalk'inal.

¹¹A Cham chi aon oc yip is conob. Yuj watx'il is c'ul Jehová, xan chi yak' junc'ulal ayon is conob on ti'.