Read Q'anjob'al Sal 33 Bible Online

Sal 33 - Q'anjob'al bible

Sal 33

¹Ex anima watx' e nabal, alek e watx' k'anej bay Jehová; is mojalil tol a eb anima ayoc yin tojolal chi bitnen Cham.

²Alek watx' k'anej bay Cham Jehová yetok arpa. Bitnanek bay Cham yetok son lajoneb is tx'anil.

³Bitnanek bay Cham yetok ac' bit. Watx' che yut e yaon oc sonal Cham yin tzalojc'ulalil.

⁴Yujtol a is k'anej Jehová yel ton wali; a is yunben Cham chi tx'oxon el is watx'c'ulalil.

⁵Chi yochej Cham tojolal c'al watx' beybalej. Chi tx'oxil ba is camc'ulal Cham bay masanil yulyibank'inal ti'.

⁶Yuj k'anej Jehová xan max watx'ji satcan yetokc'al masanil tzet ay bay.

⁷A Cham chi peon aj a' aejlak, axa a' marlak, wajan ec' a' yuj Cham.

⁸Ayokab yelapnok Jehová yul sat masanil tzet yetal ayay yiban tx'otx'. Masanil ex cajyom yulyibank'inal, xajan che yut Cham.

⁹Yujtol a Cham max k'anjabi cax max txecloj aj masanil. A' max aloni, cax max cawxi yayji.

¹⁰A Jehová chi tenon lajwok ay is nabal eb mimek conoblak,

¹¹axa tzet chi na Cham, toc'alta' chi yi yip yin tojbalk'inal.

¹²Tzalojc'ulal yet jun conob tol a Cham Jehová ayoc is Diosalok, tol a Cham chi sic'leni yuj yoccan yetok.

¹³A bay satcan t'anantek Jehová, cax chi yilontek masanil anima.

¹⁴A bay cajan ec' Cham chi yiltek masanil eb cajyom sat tx'otx'.

¹⁵A Cham max watx'nen yanimail eb. A c'apax Cham chi taynen yil tzet chi yun eb.

¹⁶C'am junok rey chi colchaj yuj xiwilxa bisil is soldado, tamwal chi colchaj eb ak'om owal, yujtol xiwil yip eb.

¹⁷A no chej, c'am yopiso no' yin colon el anima; caxc'al xiwil yip no', palta c'am chi je' colwaj no'.

¹⁸A pax Jehová xin, toc'alta' chi yil eb anima ay yelapnok Cham yul sat, cax yipxac'al c'ul eb is camc'ulal Cham.

¹⁹Chi col-lay el eb yuj Cham bay camich, c'al yak'lay low eb yuj, yet ay wajil.

²⁰A on ti' a Jehová ayoc yipok co c'ul. A Cham chon coloni, cax chon tayneni.

²¹Yuj wal tu xin chi tzaloj aj co c'ul yin Cham. Chi jaoc Cham yipok co c'ul, yujtol asanxanej ocok.

²²Ayokab oc a camc'ulal jin Mamin Jehová, yujtol chach jaoc yipok co c'ul.