Read Q'anjob'al Sal 34 Bible Online

Sal 34 - Q'anjob'al bible

Sal 34

¹A jun bit ti' max tz'ibej David yet max yuten ba yin locoal satak cham rey Abimelec, xan max uktelay el yuj. Ok wiaj can Jehová yin tojbalk'inal, toc'alta' ok wal watx' k'anej bay.

²A yin Jehová ok tzaloj aj in c'ul. Abek wali, cax tzalojanek, ex yaynakil anima.

³Alek el yabixal is mimanbilal Jehová wetok, yin wajanil chi jion aj can Cham.

⁴Max aj waw bay Jehová, max tak'wi ayin; max yican el Cham masanil in xiwc'ulalil.

⁵A mactxel chi yaoc Jehová yipok is c'ul, chi watx'ji aj yili sat eb, cax manc'al ok el q'uixwil eb.

⁶Max wal in ba bay Jehová yin ok'balc'ulal, axa Cham max abeni, cax max in is colcan el yin masanil in bilc'ulal.

⁷A eb ay yelapnok Jehová yul sat, a yángel Cham chi oymoj yin eb, cax chi col-lay el eb yuj.

⁸¡Ak'lejek, cax ok e yiloni tol watx' c'ul Jehová! ¡Tzalojc'ulal yet eb chi aon oc Cham yin is c'ul!

⁹Ayokab yelapnok Jehová yul e sat mac ex yet ex Cham; c'am majilal bay eb ay yelapnok Cham yul sat.

¹⁰A no coj chi pax yip no' yuj wajil, axa pax eb chi yiay ba bay Jehová, c'amc'alta' is majilal eb.

¹¹Ex wuninal, sebaxek, abxalwanek ayin, ok ex in cuy yin e yaon oc e nabal yin Jehová.

¹²Ta chi yal e c'ul chi najatilbi e k'inal, cax tzalojc'ulalc'al chi ec' junjun c'u e yuj,

¹³c'ayek el aloj yob k'anej, manchak e yak' lek'tial.

¹⁴Besek el e ba bay yobal, axa watx'ilal che yunej, c'amxa owal che yunej, cax che beybalnen junc'ulalil.

¹⁵A Jehová chi taynen eb anima watx' beybal, cax chi yacbaj txiquin yet chi yalon ba eb bay.

¹⁶A yowal c'ul Jehová ayoc yin eb chi unen yobal, yuj c'aylay el eb, cax c'amxa mac chi naon eb.

¹⁷Chi yab Jehová yet chi yalon ba eb anima watx' nabal, cax chi col-lay el eb yin masanil is bilc'ulal.

¹⁸A Jehová ayic' c'atan eb anima manxa animaok ay c'ul, cax chi coloncan el eb chi somchaj el c'ul yuj cusc'ulal.

¹⁹A eb anima watx' nabal, caxc'al xiwil tzet chi on eb, axa Jehová chi colon el eb yin masanil is yailal.

²⁰A Cham chi taynen eb, cax c'am junok is bakil eb chi k'ajcantok.

²¹A pax eb yobtakwom xin, a is yobc'ulal eb chi ak'on camok: a eb chi chichon oc c'ul yin eb watx' beybal, ok alay oc yailal eb.

²²Axa Jehová chi colon el yanimail eb is chekbej; man ok alay oc yailal eb chi col ba yin Cham.