Read Q'anjob'al Sal 35 Bible Online

Sal 35 - Q'anjob'al bible

Sal 35

¹A ton bit David ti' Mamin Jehová, caktzajan oc yin eb chi caktzaj oc win. Ak' owal yin eb chi yak' owal win.

²Iaj a mitx'k'ab yet owal, cax chin ul a coloni.

³Iaj a lanza cax cha makon sat eb chin ukten ec'ok. Al ayin tol ach in Colomal ach.

⁴Somchajokab eb yin q'uixawc'ulal, eb chi yochej c'ul chin cami; tokokab eb el yintak yin c'amxa yip, eb chi yochej c'ul ay tzet chin yutej.

⁵Yunokab eb axca matz'il trigo chi ilaytok yuj cak'ek'; uktelayokab eb yuj a sat ángel.

⁶K'ekk'olinakokabi cax yololiokab is be eb, axaokab a sat ángel chi ukten eb.

⁷Caxc'al c'am wal in mul, palta max yaay eb in yalil; c'am in mul, palta max watx'nej eb jun olan yet watx' chin ayc'ay yul.

⁸Michchajokab eb yuj mimek yailal. Manokab naanok yuj eb, cax chi ayc'ay eb yul yal max yay eb; k'ajokabtok eb yet chi ayc'ay eb yul olan max watx'nej eb tu'.

⁹Catatu' bian ok wak' tzaloj in c'ul en ach Jehová; ok el lenaj ok wil yuj a colwal.

¹⁰Ok wal yin masanil in c'ul axca ti': ¿Macto wal txel axca ach, Mamin Jehová? A eb meba' c'al eb ayoc yin majilal, cha colcan el eb yul k'ab eb tec'an waayi, c'al eb chi ion bey is tzet yetal eb, quin chi.

¹¹Chi tit eb lek'ti testigo win. A tzet yetal man wojtakok chi k'anlej eb ayin.

¹²A in watx'c'ulalil max paktzej eb yin yobc'ulalil ayin, cax max tx'emon cus eb in c'ul.

¹³Akxa ayin, a yet ya'ay eb, chin pichon in ba yetok an pichilej yet cusc'ulal, c'amxa chin lowi, yuj in tx'oxoni tol yel chin cusi, ya' chi wabej; c'am chin bek in txajli yul in c'ul yuj eb.

¹⁴Cusiltak in c'ul chin ec'jabi, axcaok tol a junok wamigo, ma wuẍtak, ma in txutx chin cus yuj.

¹⁵Axa yet max in ayc'ayi, max aj bulnaj eb masanil in tzeyeni. Axca wal tol tx'ok animail eb, axca tol man ojtakbilok in yuj eb, tokwal chi bek eb in is bajon elok.

¹⁶Ya' max in ec' yuj eb, max in buchon el eb, max tit t'anan eb win yetok is chichonc'ulal.

¹⁷Mamin Jehová, ¿Tom toc'al ok ach occ'al t'anan yin jun ti'? Colcan el jun pitan wanimail bay eb, axca coj chi awji tit win tu xin.

¹⁸Ok wal abixal satak xiwil anima wajan. Ok wal watx' k'anej ayach satak conob.

¹⁹Manchak tzaloj aj c'ul eb ajc'ul oc win; manchak in is tz'eysatnej eb, eb chi chichon oc c'ul win caxc'al c'am in mul bay eb.

²⁰C'am chi yochej eb tu' junc'ulal. A ti' yet eb, nanon yec' c'ul eb. C'am tzet chi yun yak'on eb owal yin eb yet conob c'am owal chi yunej.

²¹Yin ipejal chi aj yaw eb win: Mayal jila', mayal jila', ẍi eb.

²²Watx' wal elon Mamin. Ak' yowalil bay eb. Manchak ach toj najat, manchak ach el in c'atan.

²³Ajan wan Mamin Wajawil, in Diosal ach. Colin, watx'nej el jun in k'anej ti', cax ocan wetok.

²⁴Ach Jehová in Diosal, beyc'ulnej in atac'ala' a tojolal, chi wochej tol c'am chin tzeyelay yuj eb.

²⁵Manchak yal eb win axca ti': Jochwan wal axca tu'. Junelnej max jetnejcantok, manokab ẍiok eb.

²⁶Ayc'ayokab eb, somchajokab el c'ul eb chi yak' tzaloj c'ul yuj yatakilal chi tit wiban. Q'uixwokokab aj eb yel miman chi yut ba in satak.

²⁷Palta bian, a wal eb chi yochej chi yila' tol watx' chin elocok, tzalojokab aj c'ul eb. Elokab yaw eb yuj tzalojc'ulal, yalokab eb yin junjun txolan: A Jehová miman ton yayji ocok; ay is tzalojc'ulal Cham yin is watx'ilal is chekbej, ẍiokab eb.

²⁸Ok walil a tojolal; yin tojbalk'inal ok walc'al watx' k'anej ayach.