Read Q'anjob'al Sal 38 Bible Online

Sal 38 - Q'anjob'al bible

Sal 38

¹A ton bit David ti' Mamin Jehová, manchak in ak' cuenta yin yowal a c'ul. Man aoc tz'um win yin a k'ak'alc'ulal.

²Mayal oc txolan a julbal win. A a k'ab max tit wiban.

³A yuj yowal a c'ul, caw wal ya'ay masanil in mimanil chi wabej yujc'al max oc in mul ayach.

⁴A in yobc'ulalil chemantok wiban axca ikatz, tol c'amxa chi techaj wuj.

⁵Yujc'al in pitalil xan lananxa yakbitok in yas, cax chi k'atok.

⁶Nojan in ayok chin beyi. C'amxac'al tzet chi el waloni. C'am chi xew in cusilal jabok.

⁷Xiwil chi tz'atok in nan yuj k'ak'al ilya', cax ijan chin cam chi wabej.

⁸Buyan inxac'al, cax c'amxa wip. Chin k'akwi yuj in bilc'ulal.

⁹Mamin Wajawil, ojtak masanil wochwan. A wal yet chi sik'son jay in c'ul, a sat yayji ocok.

¹⁰Aymanxac'al chi bil wanimail, bijijixac'al yel wip, c'amxa chi je' wilwi.

¹¹A eb in watx'il anima, c'al eb junej chin ec' yetok, max toj eb najat, yetok eb cajan in cawilal, max bescan el ba eb in c'atan yuj in yas.

¹²A eb chi yochej chin yak' camok, lanan yaon ay eb in yalil. A eb chi yochej chi etnencantok in nabal, lanan yel ti' eb win yin tzetbil chi yun wetaxcan elok. C'am chi xew eb naobtanen tzet ok in yut eb yin ewantakil.

¹³A pax ayin xin, axcaok tol c'am chi wab tzet chi yal eb, axcaok tol makan in txiquin; axca tol c'am chi je' in k'anjabi, c'am tzet chi wala'.

¹⁴Lajan in axca mac c'am chi yabej cax c'am chi je' yalon ba.

¹⁵Ach Jehová, achc'al chach waoc yipok in c'ul. Ach Wajaw Dios, ok in a tak'wej.

¹⁶Asan tol c'amokab chin is tzeyej eb, ẍi in c'ul. Manchak yak' eb bit yet tzalojc'ulal win ta chin ayc'ayi. A jun tu' chin k'an ayach.

¹⁷Palta lananxa wayc'ay chi wabej. C'am chin xew yin in yatakilal jabok.

¹⁸Ok walajtek in mul xin. Manxa animaok ay in c'ul yuj in yobtakil.

¹⁹Mayal wal aj can eb ajc'ul oc win. Xiwil eb c'am chin ocheni, caxc'al c'am in mul bay eb.

²⁰Yobc'al chi yut eb c'ul win yuj in watx'c'ulal bay eb. Chi oc eb ajc'ulal win, yujc'al chin beybalnej watx'c'ulalil.

²¹Mamin Jehová, manchak in a bekcanok. Ach in Diosal, man a besil a ba ayin.

²²Ach Wajawil, ach in Colomal, titan ayman in ul a coloni.