Read Q'anjob'al Sal 39 Bible Online

Sal 39 - Q'anjob'al bible

Sal 39

¹A ton bit David ti' Max in nabalnej tol chin taynej in beybal, cax c'am chi oc in mul yin in k'anej waloni, c'al in mitx'on waay in ti' yak'ban ayic' eb anima yob c'ul in satak.

²Max in tz'inji elok, tamwal maxto wal watx' k'anej. Axa in yailal max tec'al aj can.

³Lanan yoc k'ak'al in pixan yin txam in c'ul max wabej. Catawal tu' max aj can yul in nuk' in k'anjabi, max waloni:

⁴Mamin Jehová, al wabej, ¿tzet ok in onok? ¿Jayebto abil ayin ec'ok? Chi wochej chi wojtaknej elok tol txennej in k'inal.

⁵Sebk'inal max ot ak'on in k'inal. Tokwal miman in k'inal a satak. A ayon anima on ti' axcac'al ibal cak'ek' co k'inal on.

⁶Masanil on axcac'al enelej jayji, nabac'al chi co ten c'unbok co ba. Tok chi jak' co nabal yetok co beyomal chi co bulbaj ec'ok. Man jojtakok on mactxel ok ioncanok.

⁷Axa tinani', Mamin Wajawil, ¿tzet watx' chi wechbanej? Ach ayach oc yipok in c'ul.

⁸Colin el bay masanil wec'nakilal. Manchak in a cha' buchlay yuj eb yob nabal.

⁹Axca eb c'am chi je' k'anjabi max wut in ba. C'am tzet max wala' yujtol ach max aoc juntzan ti' win.

¹⁰Ican el in yailal max aocok. Lananxa in lajwi ay chi wabej yuj a mak'benal.

¹¹Ach chaoc co yailal on ayon anima on ti'. Chak'on jik tz'um yuj co mul, cax pokokxac'al chi yuncan el tzet yetal chi co camc'ulnej. Co masanil axcac'al ibal cak'ek' yayji co k'inal on.

¹²Mamin Jehová ab jun in txaj ti', ocan t'anan bay chi wal in ba ayach. Manchak ach tz'inji bay wok'ilal. Yel chi wal Mamin, ec'jabwom in yul a sat axca eb wichmam.

¹³I el a k'ak'alc'ulal win, yet watx' chi wi' in tzalojc'ulal junok bek, yak'ban c'amto chi el in c'ul, quin chi.