Read Q'anjob'al Sal 4 Bible Online

Sal 4 - Q'anjob'al bible

Sal 4

¹A ton bit David ti' Ach Dios, watx'nemal ach el in k'anej, tak'wej in yet chach wawteni. A yet ayin oc yin yailal, max quin a xuyon elok. Ok' wal a c'ul win tinani' xin; abintek yin in txaj ti'.

²Ex wet animail, ¿bak'in ok e bek e yalon in k'umal? ¿bak'in ok e bek e yocheni, c'al e sayon k'anej c'am yelapnok, tol man yelok?

³Abek xin, a Jehová max sic'on el eb anima ayoc nabal yin, yet watx' chi oc eb yetok. Chin is tak'wej Cham yet chi wawteni.

⁴Luklonanek, cax manchakxa oc e mul. A yet telan ex ayok, yet tz'ininixac'al, beyc'ulnejek e ba.

⁵Ak'ek xajanbal yin yel bay, cax aek oc Cham Jehová yipok e c'ul.

⁶Xiwil eb chi aloni: ¿Mactxel chi tx'oxon watx'ilal ayon? ẍi eb. Mamin Jehová, tx'ox a watx'c'ulal ayon.

⁷Ti' wal ach max etek tzalojc'ulal bay wanimail, caw wal miman yintak is tzalojc'ulal eb xiwil is trigo, c'al xiwil is vino.

⁸C'am tzet chin na' yet chin ay telanok, axa yoc numnaj in wayan tu'. Mamin Jehová, ach ton ayach oc wetok xan c'am tzet chin oni.